ЯҢАЛЫКЛАР

2014 елның 1 июнендә “Көньяк” сәүдә-тамаша үзәгендә (адресы: Җиңү проспекты 91) Халыкара балаларны яклау көненә һәм Халыкара әйләнә-тирәлекне яклау көненә багышланган “Балаларга – яшел дөнья” исемле бәйрәм чаралары уздырыла.

28 майда, Казан шәһәренең Совет районы территориясенең санитар-экологик торышын тикшергәндә, Татарстан Экология һәм табигый байлыклар министрлыгының дәүләт инспекторлары сыек калдыклар (нефть эшкәртү продуктлары дип фаразлана) түгелү фактын ачыклады, адресы – Себер тракты 34/10. Шул факт буенча экологик тикшерү акты төзелде, пычранган территориянең мәйданы үлчәнде, туфрактан һәм калдыкның үзеннән пробалар алынды. Пычратылган җирнең тулай мәйданы 1200 квадрат метр. Түгелү урынына кичекмәстән Экология министрлыгының махсуслашкан үзәк аналитик контроль инспекциясе белгечләре, Гадәттән тыш хәлләр министрлыгының Казан шәһәр идарәсе һәм РФ Эчке эшләр министрлыгының Казан шәһәр идарәсенең Совет районындагы 12нче “Гвардия” полиция бүлеге хезмәткәрләре чакырылды.

Татарстан Экология һәм табигый байлыклар министрлыгында “Татарстанда табигать саклау йомгаклары: тарихы һәм бүгенгесе” дигән, Татарстанның беренче табигать саклау министры Анатолий Щеповских истәлегенә багышланган китап ясау буенча редакцион коллегия әгъзалары белән очрашу булып узды.
Түгәрәк өстәл артына республиканың әйләнә-тирәлекне саклау өлкәсендәге фәнни җәмәгатьчелеге вәкилләре: Валериан Гаранин, Венера Латыйпова, Рифгать Шаһидуллин һәм башкалар җыелган иде. Анда шулай ук Нина Щеповских катнашты.

Татарстанда санитар-эпидемиологик икеайлык дәвам итә. Тулаем, торак пунктлар тәртипкә китерелгән. Хәзер эре торак пунктларга, аерым алганда Казан шәһәренә якын торган территорияләрдә рөхсәтсез калдыклар ташлау урыннарын бетерү эшләре бара. Шул максаттан Татарстан Экология һәм табигый байлыклар министрлыгы җитәкчелеге республика территориясен вертолеттан күзәтүләр оештыра.

Бүген Казанда, санитар-экологик икеайлык кысаларында, халык күпләп ял итә торган урыннарны чистарту буенча “Яшел башкала” акциясе уздырылды. Җәмәгать оешмалары активистлары, Казан (Идел буе) федераль университеты һәм Казан милли тикшеренү-технология университеты студентлары “Миллениум” күпере төбәгендә Казансу елгасының яр буе зонасын тәртипкә китерделәр, 80 капчык чамасы чүп-чар җыелды. Ә Локомотив пляжы территориясен Казан дәүләт энергетика университеты студентлары җыештырды, алар 40 капчык чүп-чар җыйды. Бу көнне акциядә барлыгы 250 чамасы кеше катнашты.

2014 елның 12 маенда Татарстанның гомуми белем бирү оешмаларында “Бердәм экологик дәрес” дигән еллык республика акциясе уздырылды, ул Халыкара Экологик белемнәр көненә багышланган иде. Бишенче тапкыр уздырылган бу акцияне Татарстан Мәгариф һәм фән министрлыгы белән берлектә, республика районнары һәм шәһәр округлары хакимиятләре белән хезмәттәшлек итеп, Татарстан Экология һәм табигый байлыклар министрлыгы оештырды. Лекторлар сыйфатында Экология министрлыгы, Урман хуҗалыгы министрлыгы, Татарстан буенча Россия авыл хуҗалыгы күзәтчелеге, Россия кулланучылар күзәтчелеге, Россия табигать күзәтчелеге, Казан районара табигать саклау прокуратурасы, Идел-Кама дәүләти табигать-биосфера тыюлыгы хезмәткәрләре, җәмәгать оешмалары активистлары чыгыш ясады.

Бу көннәрдә Казанда, санитар-экологик икеайлык кысаларында, халык күпләп ял итә торган урыннарны җыештыру буенча “Яшел башкала” акциясе бара. Чараны Казан шәһәр башкарма комитеты, шәһәрнең җәмәгать оешмалары, республика ВУЗлары ярдәме белән Татарстан Экология һәм табигый байлыклар министрлыгы оештырды. Бүген Казан дәүләт аграр университеты студентлары һәм җәмәгать оешмалары вәкилләре Зәңгәр күл территориясен тәртипкә китерделәр, 50 капчык чамасы чүп-чар җыелды.

Татарстан экология һәм табигый байлыклар министры Артем Сидоров шушы көннәрдә Түбән Новгородта узучы “Бөек елгалар” 16нчы Халыкара фәнни-индустриаль форумында катнаша. Форум дөньяның бөек елгалары экономикасын тотрыклы, экологик куркынычсыз үстерү проблемаларына багышланган. Аның төп бурычлары булып тотрыклы үсешнең хокукый, норматив һәм экономик механизмнарын әзерләү, елга бассейннарындагы төбәкләрнең эшчәнлеге белән идарә итүнең һәм координацияләүнең, халыкара хезмәттәшлекнең һәм халыкара проектларны тормышка ашыруның нәтиҗәле формаларын булдыру тора.

Бүген, санитар-экологик икеайлык кысаларында, Горький тимер юлының Казан төбәге Казан – Коркачык – Юдино – Яшел Үзән – Казан маршруты буенча кабаттан комиссия белән карап узылды. Татарстан Экология һәм табигый байлыклар министрлыгы, Татарстан Транспорт һәм юл хуҗалыгы министрлыгы, Горький тимер юлы хезмәткәрләре, Татарстан буенча Россия табигать күзәтчелеге, Россия кулланучылар күзәтчелеге, Казан шәһәренең Административ-техник инспекциясе, Казан шәһәре, Биектау һәм Яшел Үзән районнары хакимиятләренең вәкилләре тимер юл буйларының санитар торышын күзәттеләр. Исегезгә төшерәбез – беренче карап узу 2014 елның 25 апрелендә булган иде. Чүпләнгән территорияләрне чистарту буенча күп эшләр эшләнде. Тулаем тәртип булдырылды, калган рөхсәтсез калдык ташлау урыннарын бетерү дәвам итә.

12 май көнне Татарстанның белем бирү оешмаларында Халыкара Экологик белемнәр көненә багышланган “Бердәм экологик дәрес” акциясе уздырыла.
Татарстан Экология һәм табигый байлыклар министрлыгы, Татарстан Урман хуҗалыгы министрлыгы, Татарстан буенча Россия авыл хуҗалыгы күзәтчелеге, Россия кулланучылар күзәтчелеге, Россия табигать күзәтчелеге, Казан районара табигать саклау прокуратурасы хезмәткәрләре, галимнәр, җәмәгать оешмалары активистлары мәктәп балаларына һәм студентларга, яшь буында әйләнә-тирәлеккә сак караш тәрбияләү максатыннан, лекцияләр укыячак.