Казанда Халыкара балаларны яклау көненә һәм Халыкара әйләнә-тирәлекне саклау көненә багышланган бәйрәм уздырыла

2014 елның 1 июнендә “Көньяк” сәүдә-тамаша үзәгендә (адресы: Җиңү проспекты 91) Халыкара балаларны яклау көненә һәм Халыкара әйләнә-тирәлекне яклау көненә багышланган “Балаларга – яшел дөнья” исемле бәйрәм чаралары уздырыла.
Бәйрәм кысаларында, «Көньяк» үзәгенең икенче катында, КДАТУ каршындагы «ДАШКА» Балалар архитектура-дизайн мәктәбе җитәкчелегендә 4-12 яшьлек балаларның катыргы ЭКО-шәһәр төзүе, «Радуга» экологик театрының «Нарат турында баллада» дигән сәхнә тамашасы һәм Татарстанның нәфис гимнастика буенча абсолют чемпионы, Россиянең спорт мастеры Дарья Шарованың «Бию һәм пластика студиясе» коллективы ярдәмендә оештырылган балалар биюе конкурсы планга кертелгән. «Көньяк»ка керү алдыннан да сәнгать бәйгесе уздырылачак. Чара 11.00дә башлана.
Бәйрәм Татарстан Экология һәм табигый байлыклар министрлыгының, «Яшел Бастион» иҗтимагый һәм гражданлык башлангычлары фондының турыдан-туры ярдәме белән үткәрелә.
Министрлыкның матбугат хезмәте