ЯҢАЛЫКЛАР

Кама буе территориаль идарәсе инспекторлары, планлы тикшерүгә чыгып, “ТИС” ҖЧҖнең закон бозып эш итүен ачыкладылар. Порошоклы буяуны полимерлаштыру мичен эшләткәндә оешма атмосфера һавасына махсус рөхсәтсез килеш зарарлы пычраткыч матдәләр чыгарган, шуның белән “Атмосфера һавасын саклау турындагы” Федераль законның (№ 96-ФЗ, 04.05.1999) 14 ст. 1 пунктын бозган.

“Мәктәбемнең саулыгы” (мәктәп экология күзәтчелеге) фәнни-практик проектын тормышка ашыру кысаларында, Татарстан Экология һәм табигый байлыклар министрлыгының Идел аръягы территориаль идарәсе бинасында, 2нче Буа шәһәр мәктәбендәге экологик түгәрәкнең күчмә практик шөгыле уздырылды.
Мәктәп укучылары Үзәк махсус аналитик контроль инспекциясенең Идел аръягы филиалы эшчәнлеге белән таныштылар, монда алар өчен Зөя елгасы суына лаборатор анализ буенча практик шөгыль үткәрелде.

12 мартта Татарстан Дәүләт Советында Экология, табигатьтән файдалану һәм аграр мәсьәләләр комитеты утырышы булып узды. Татарстан Экология һәм табигый байлыклар министрлыгының туфракларны саклау һәм җир ресурсларын рациональ куллану өлкәсендәге законнарны үтәве турындагы доклад белән министрның беренче урынбасары Рөстәм Камалов чыгыш ясады. Чыгышта әйләнә-тирәлекнең торышына һәм пычрануына дәүләти мониторинг өлешендә Росгидромет идарәсе белән уртак эшләр дә билгеләп үтелде.
Экология министрлыгы туфраклар мониторингын расланган графиклар буенча башкара. Хәзерге вакытта күзәтүләрне Министрлыкның 8 махсус аналитик контроль инспекциясе 37 күзәтү ноктасында, шул исәптән аеруча саклаулы табигать территорияләрендә алып бара, пычраткыч матдәләрнең фон күрсәткечләре алына һәм бәяләнә, табигатьтән файдаланучыларның хуҗалык эшчәнлегенә дәүләти экологик күзәтчелек ителә.

Татарстан Экология һәм табигый байлыклар министрлыгы, Татарстан Хөкүмәте һәм Су ресурслары федераль агентлыгы ярдәмендә, 26 – 28 март көннәрендә “Чиста су. Казан 2014” дигән V Махсус күргәзмә һәм конгресс үткәрә.
“Чиста су. Казан” – янәшә узучы күргәзмәдән һәм конгресстан торган комплекслы чара ул, анда алдынгы технологияләр күрсәтүне тармак алдында торган проблемаларны тикшерү белән берләштерергә мөмкин булачак. Катнашучы компанияләр күргәзмәдә су ресурсларын яңадан торгызу һәм саклау, коммуналь һәм индустриаль су тәэминәте, юынты суларны чистарту, суны шешәләү өчен булган барлык төр җиһазларын һәм хезмәтләрен күрсәтәчәкләр.

2014 елның 24-25 апрелендә Мәскәүдә “Кеше саулыгы һәм туклану – 2014” дигән Икенче Халыкара Форум уздырыла. Чараның төп максаты булып халык саулыгының, туклану сыйфатының һәм тормыш рәвешенең үзара бәйләнешенә ирешү; азык-төлек куркынычсызлыгын законнар белән тәэмин итү өлкәсендә карарлар чыгару, авыруларны туклану аркылы профилактикалау һәм дәвалау; илдә экологик таза азык-төлек базарын үстерү; социаль, шифалы һәм профилактик туклануны оештыруны камилләштерү тора.

Татарстан Экология һәм табигый байлыклар министрлыгының Кама буе территориаль идарәсенә “Единство” гараж җәмгыяте ягыннан Чаллы, Яңа шәһәр, 52 комплекс, Җиңүнең 40 еллыгы урамы адресы буенча урнашкан 8нче “Зоренька” балалар бакчасы ягына таба бик күп төтен агылу турында гражданнардан хәбәр керде. Идарә белгечләре рейд оештырып, атмосфера һавасына чыгарылган пычраткыч матдәләрнең пробасын алдылар. Тикшерү нәтиҗәләре буенча, бер гаражда “Орион-Мет” ҖЧҖнең склады корылган булу, шуннан әйләнә-тирәлеккә атмосфера һавасын пычратучы матдәләр (углерод оксиды, азот диоксиды, корым) чыгуы ачыкланды. Факт буенча, “Атмосфера һавасына зарарлы матдәләр чыгару яисә аңа махсус рөхсәтсез зарарлы физик йогынты ясау” турыдагы РФ КоАП 8.21 1 ст. нигезендә, административ хокук бозу турында беркетмә төзелде. Материаллар Чаллы судына тапшырылып, аның карары белән “Орион-Мет” ҖЧҖ эшчәнлеге 30 тәүлеккә туктатылды.

Татарстан Экология һәм табигый байлыклар министры Артем Сидоров “Газпромбанк” ачык акционерлык җәмгыятенең беренче вице-президенты Татьяна Юрлова белән очрашты. Органик калдыкларны югары нәтиҗәле микробиологик препаратлар белән эшкәртү тәкъдимнәре каралды.

Казан Теннис академиясендә IV Республика Яшьләр форумы булып узды. Быел Форумның йомгаклау этабына сигез мәйданчык буенча 46 проект тапшырылган иде. Форумда 16-30 яшьтәгеләр (35 яшькә кадәрге галимнәр), Татарстанның югары һәм махсус урта уку йортларында укучы студентлар, республиканың балалар һәм яшьләр җәмәгать оешмалары активистлары катнашты.
“Экологик куркынычсызлык” юнәлеше буенча финалга “Есо Арр” һәм “Шәһәрдә агач утырту планировкасын оптимальләштерүнең программа комплексы һәм методикасы” дигән 2 проект чыкты.

Бүген Татарстан Экология һәм табигый байлыклар министрлыгының Үзәк территориаль идарәсе инспекторлары Адмиралтейство бистәсенә чираттагы рейдларын үткәрделәр. Бергә эш итү өчен Казан Районара прокуратурасыннан, Россия Федерациясе Тикшеренү комитетының Идел төбәкара тикшеренү идарәсенең Алтынчы табигать саклау тикшеренү бүлегеннән, Татарстан буенча Россия Табигать күзәтчелегеннән вәкилләр, “Водоканал” муниципаль унитар предприятиесе белгечләре чакырылган иде. Предприятиеләрнең Казансу елгасының иске тармагына юынты һәм яңгыр суларын агызу торбалары тикшерелде. Министрлыкның Үзәк махсуслашкан аналитик контроль инспекциясе инспекторлары юынты сулар табигый суларга кушылган җирләрдән, пычрану кимәлен билгеләү өчен, 4 юынты су пробасы һәм 2 табигый су пробасы алдылар. Үзәк территориаль идарә инспекторы Алмаз Закировның әйтүенчә, тикшерүнең төп максаты – пычрану чыганакларын ачыклау, гаеплеләрне законда каралган җаваплылыкка тарту һәм пычранган юынтылар агызуны туктату.

Мәскәүдә Табигатьтән файдалану һәм әйләнә-тирәлекне саклау департаменты Коллегиясенең “Мәскәүдә әйләнә-тирәлекнең 2013 елгы торышы һәм 2014 елга бурычлар турындагы” утырышы булып узды. Чарада катнаштылар: Россия Федерациясе Табигый байлыклар һәм экология министры урынбасары Ринат Гыйззәтуллин, Мәскәү шәһәр Думасының Экологик политика комиссиясе рәисе Вера Степаненко, Мәскәү өлкәсе Экология һәм табигатьтән файдалану министры Анзор Шомахов; РФА Халык хуҗалыгын прогнозлау институтының әйләнә-тирәлекнең сыйфатын һәм халык саулыгын прогнозлау лабораториясе, Россия Экологик политика үзәге, Россия WWF, “Экологик сертификация үзәге – Яшел стандартлар” коммерциясез партнерлыгы вәкилләре. Татарстаннан исә республиканың Экология һәм табигый байлыклар министры урынбасары Рөстәм Камалов катнашты.