ЯҢАЛЫКЛАР

Бүген Татарстан Экология һәм табигый байлыклар министрлыгы инспекторлары, Татарстан буенча ЭЭМның юл хәрәкәте куркынычсызлыгы дәүләт инспекциясе идарәсе хезмәткәрләре белән бергә, “Саф һава” операциясе кысаларында, чираттагы рейдларын үткәрделәр. Рейд барышында Министрлык инспекторлары “Лаеш” стационар полиция постында транспорт чараларының төтен газларындагы зарарлы пычраткыч матдәләр микъдарын газ анализаторы – газлар катнашмасына сыйфат һәм күләм анализы приборы ярдәмендә үлчәделәр. Автотранспорт чараларының төтен газлары белән пычраткыч матдәләр чыгаруның билгеләнгән нормативларын үтәүгә күзәтчелек буенча оператив профилактик чаралар республикада автотранспортның әйләнә-тирәлеккә негатив йогынтысын киметү максатыннан үткәрелә.

Бүген Татарстан Экология һәм табигый байлыклар министрлыгында республиканың 2014 елгы санитар-экологик икеайлыгында актив катнашкан экологик хәрәкәт вәкилләрен, табигать саклау акцияләрендә, экологик агарту чараларында актив катнашучылар бүләкләнде. Рәхмәт хатларын Министр Артем Сидоров тапшырды. Җыелганнарга ул күрсәткән активлыклары өчен рәхмәт белдерде, шулай ук икеайлык чорында табигать саклау законнарына күзәтчелек, каты көнкүреш калдыкларын законсыз ташлау урыннарын ачыклау һәм бетерү буенча зур эшләр эшләнүен билгеләп үтте. Хәбәр тарату чаралары вәкилләре, предприятие җитәкчеләре алда торган “Эколидер”, “Кеше һәм табигать” конкурсларында аерым билгеләп үтеләчәк, дип ышандырды.

Бүген Татарстан Министрлар Кабинетында республика министрлыклары һәм тармаклары каршындагы җәмәгать советларының эшчәнлеге буенча киңәшмә уздырылды. Татарстан Республикасы Җәмәгать Палатасы карары белән Татарстан Экология һәм табигый байлыклар министрлыгының эшчәнлеге Татарстан Республикасы Җәмәгать Палатасының “Гражданлык җәмгыятен үстерүгә өлеш керткән өчен” Мактау билгесе белән билгеләнде.

2014 елның 26-27 июнендә Болгар шәһәрендә “ЭКОДУЛКЫН – 2014” Икенче республика экология форумы уздырыла. Аны, Татарстанда экологик хәрәкәтне үстерү максатында, Татарстан Дәүләт Советы каршындагы иҗтимагый яшьләр палатасы һәм Татарстан Экология һәм табигый байлыклар министрлыгы ярдәмендә, “Россия студент отрядлары” бөтенроссия яшьләр оешмасы үткәрә. Форум эшендә экологик хәрәкәт җитәкчеләре һәм активистлары, экология буенча республика һәм Россия челтәр проектлары координаторлары һәм активистлары катнаша. Шулай ук Татарстанда экологик хәрәкәтне үстерү буенча бәхәс мәйданчыклары оештыру, экологик эш тәҗрибәләре белән уртаклашу, төрле мастер-класслар, түгәрәк өстәлләр үткәрү күздә тотыла.

Бүген Казан дәүләт энергетика университетында Табигатьтән файдалану өлкәсендә күзәтчелек буенча федераль службаның Татарстан бүлекчәсе төзелүнең 10 еллыгына багышланган “Калдыклар белән эш итү өлкәсендә табигать саклауның экономик механизмнарын көйләүне тормышка ашыру. Чит ил һәм Россия компанияләренең тәҗрибәсе” дигән халыкара фәнни-гамәли конференция булып узды. Конференция эшендә Татарстан Премьер-министрының беренче урынбасары Алексей Песошин, Татарстан буенча Россия табигать күзәтчелеге идарәсе башлыгы Фәрит Хәйретдинов, Татарстан экология һәм табигый байлыклар министры Артем Сидоров, чит ил һәм Россия галимнәре, Швеция, Чехия һәм Финляндиянең чүп-чар сортлау һәм эшкәртү компанияләре вәкилләре катнашты.

Бүген Казанда, “Аръяк” балаларны савыктыру лагерында Яшь геологларның республика кыр олимпиадасы ачылды. Тантанада Татарстан Премьер-министры Илдар Халиков, Премьер-министр урынбасары – Татарстан мәгариф министры Энгель Фәттахов, Татарстан экология һәм табигый байлыклар министры Артем Сидоров катнашты.
2014 елның 10 июленә кадәр барачак бу олимпиадада Татарстаннан 26 команда һәм Кырымның Бакчасарай районы командасы катнаша. Чара сәләтле балаларны ачыклау, аларга ярдәм итү, һөнәри юнәлеш бирү, геология фәненең иң яхшы традицияләрен пропагандалау максатыннан үткәрелә. Анда мәктәп укучыларының палеонтология, петрография, минералогия, кристаллография, геохимия, экогеология, структур геология, тарихи геология, инженерлык геологиясе, гидрогеология, файдалы казылмалар геологиясе, геологик профильле башка фәннәр буенча белемнәрен гамәлдә куллану мәсьәләләре кузгатыла.

2014 елның 29-30 маенда Сочида уздырылган “Су мөнәсәбәтләрен хокукый көйләү: көнүзәк бурычлар һәм проблемалар” дигән Бөтенроссия фәнни-гамәли конференциясе кысаларында Россия Федерациясенең су хуҗалыгы комплексы өлкәсендәге Беренче Милли премия лауреатлары бүләкләнде. Премия “Россия Федерациясенең су хуҗалыгы комплексын 2012 – 2014 елларда үстерү” федераль максатчан программасы кысаларында Россия Табигый байлыклар һәм экология министрлыгы башлангычы белән булдырылган. Ил тарихында беренче тапкыр буларак, су хуҗалыгы комплексы үсешенә сизелерлек өлеш керткән оешмалар, җәмәгать эшлеклеләре һәм галимнәргә бүләкләр тапшырылды. Номинантлар исемлегендә – су ресурсларын саклау проблемалары белән шөгыльләнүче дәүләт органнарының, бизнес өлкәсенең, экологик җаваплылыклы компанияләрнең, фән өлкәсенең иң яхшы вәкилләре.

Чаллы шәһәренең Бакчачылык урамында урнашкан предприятиеләрнең атмосфера һавасына зарарлы (пычраткыч) матдәләр чыгаруы турында гражданнар мөрәҗәгатьләренә нигезләнеп, Татарстан Экология һәм табигый байлыклар министрлыгының Кама буе территориаль идарәсе белгечләре шул хокук бозуга бәйләнешле затларга карата административ тикшерү үткәрделәр.

Татарстан Экология һәм табигый байлыклар министрлыгының Кама буе территориаль идарәсе хезмәткәрләре, ЛОВД, ОБЭП хезмәткәрләре белән берлектә, 2014 елның 6 маенда, дәүләти экологик мониторинг кысаларында, Түбән Кама сусаклагычы акваториясенә рейд үткәрделәр. Киң таралган файдалы казылмаларны, атап әйткәндә руда булмаган төзелеш материалларын “Кама Транс Флот” ҖЧҖ милкендәге “Прага-4” земснарядын файдаланып чыгару ачыкланды. Бу эш 2014 елның 25 апреленнән 6 маена кадәр эшләнгән, казылмалар төрле компанияләр милкендәге “Окский 21”, “Дунайский 47”, “Алтай”, “Окский 37”, “Кама 1”, “Дунайский 18”, “Коломна 1”, “Дунайский 22” баржаларына төялгән. Киң таралган файдалы казылмалар тулаем 46 963 тонна чыгарылган. Зыян 9 миллион 990 мең 307 сум исәпләнә. Казылма чыгаруның адресы: ТР, Минзәлә районы, Кама елгасы суднолар йөрешенең 1668 – 1669 км арасы. “Прага-4”тә шундый лицензияләре булган:
1. ТУК № 01082 ТЭ, иясе “Кама-Волга Транс” ҖЧҖ ТК, “Тарлау-2” яткылыгы, Кама елгасы суднолар йөрешенең 1657,0 - 1662,25 км интервалы.

Бүген Мәскәүдә, Дәүләти Кремль Сараенда, Табигать саклау өлкәсендә федераль күзәтчелек службасының 10 еллыгына һәм Бөтендөнья әйләнә-тирәлекне саклау – Эколог көненә багышланган тантаналы чаралар үткәрелә. Чараларда федераль һәм региональ дәүләт хакимияте органнарыннан, экологик оешмалардан, бизнес җәмгыятьләреннән вәкилләр катнаша. Татарстан делегациясен Россия Федерациясе Дәүләт Думасы депутаты Фатих Сибгатуллин, Татарстан экология һәм табигый байлыклар министры Артем Сидоров, Татарстан буенча Россия Табигать күзәтчелеге җитәкчесе Фәрит Хәйретдинов тәшкил итә.