Татарстан Экология министрлыгы Россия су хуҗалыгы комплексында идарә мәсьәләләрен иң нәтиҗәле чишүче хакимият органы дип танылды

2014 елның 29-30 маенда Сочида уздырылган “Су мөнәсәбәтләрен хокукый көйләү: көнүзәк бурычлар һәм проблемалар” дигән Бөтенроссия фәнни-гамәли конференциясе кысаларында Россия Федерациясенең су хуҗалыгы комплексы өлкәсендәге Беренче Милли премия лауреатлары бүләкләнде. Премия “Россия Федерациясенең су хуҗалыгы комплексын 2012 – 2014 елларда үстерү” федераль максатчан программасы кысаларында Россия Табигый байлыклар һәм экология министрлыгы башлангычы белән булдырылган. Ил тарихында беренче тапкыр буларак, су хуҗалыгы комплексы үсешенә сизелерлек өлеш керткән оешмалар, җәмәгать эшлеклеләре һәм галимнәргә бүләкләр тапшырылды. Номинантлар исемлегендә – су ресурсларын саклау проблемалары белән шөгыльләнүче дәүләт органнарының, бизнес өлкәсенең, экологик җаваплылыклы компанияләрнең, фән өлкәсенең иң яхшы вәкилләре.
Россия Федерациясенең су хуҗалыгы комплексы өлкәсендәге Беренче Милли премия лауреатлары булдылар:
1. Татарстан Республикасы Экология һәм табигый байлыклар министрлыгы – “Россия Федерациясенең су хуҗалыгы комплексы белән идарә итү өлкәсендәге мәсьәләләрне иң нәтиҗәле чишүче хакимият органы, тармагы” номинациясендә.
2. Мышкино муниципаль районы администрациясе – “Инициатива: “Россия суы” максатчан федераль программасын тормышка ашыру кысаларындагы иң яхшы проект” номинациясендә.
3. Бөтенроссия табигать саклау җәмгыяте – “Россия Федерациясенең су хуҗалыгы комплексын үстерүгә зур өлеш керткән коллектив, оешма, ассоциация” номинациясендә.
4. “Экологик проектлар консалтингы” фәнни берләшмәсе – “Судан рациональ файдалану идеяләрен иңдерү буенча иң яхшы мәгариф проекты” номинациясендә.
5. “Санкт-Петербург су каналы” предприятиесе – “Җәмгыятьтә суга карата ихтирам формалаштыруга юнәлтелгән иң яхшы информацион проект” номинациясендә.
6. Омск өлкәсе Табигый байлыклар һәм экология министрлыгы, “Экология проектлары консалтингы институты” фәнни берләшмәсе, Омск өлкәсе буенча Түбән Обь бассейны сулыклары идарәсе, Омск ш. “Балалар экология-биология үзәге”, Кока-Кола ЭйчБиСи Евразия – “Илнең су хуҗалыгы комплексын яклауга юнәлтелгән иң яхшы җәмәгать акциясе” номинациясендә.
7. “Россия гидромет-үзәге” ФДБИ – “Россия Федерациясенең су хуҗалыгы комплексын үстерү өлкәсендәге иң яхшы фәнни эзләнү, проект, эшләнмә” номинациясендә.
8. “РЖД” ААҖ – “Су ресурсларыннан рациональ файдалануны күтәрүгә юнәлтелгән иң яхшы проект” номинациясендә, һәм башкалар.
ТР Экология министрлыгының матбугат хезмәте