Казанда калдыклар белән эш итү өлкәсендәге экономик механизмнар мәсьәләсе тикшерелде

Бүген Казан дәүләт энергетика университетында Табигатьтән файдалану өлкәсендә күзәтчелек буенча федераль службаның Татарстан бүлекчәсе төзелүнең 10 еллыгына багышланган “Калдыклар белән эш итү өлкәсендә табигать саклауның экономик механизмнарын көйләүне тормышка ашыру. Чит ил һәм Россия компанияләренең тәҗрибәсе” дигән халыкара фәнни-гамәли конференция булып узды. Конференция эшендә Татарстан Премьер-министрының беренче урынбасары Алексей Песошин, Татарстан буенча Россия табигать күзәтчелеге идарәсе башлыгы Фәрит Хәйретдинов, Татарстан экология һәм табигый байлыклар министры Артем Сидоров, чит ил һәм Россия галимнәре, Швеция, Чехия һәм Финляндиянең чүп-чар сортлау һәм эшкәртү компанияләре вәкилләре катнашты.
Татарстан Республикасының калдыклар белән эш итү өлкәсендәге стратегиясе турында доклад белән Татарстан экология һәм табигый байлыклар министры Артем Сидоров чыгыш ясады. Аның әйтүенчә, республика территориясендә якын перспективада җитештерү һәм куллану калдыклары белән эш итүнең комплекслы системасын төзү күздә тотыла, бу исә белешмә, хокук, оештыру институтлары һәм механизмнарының, шулай ук калдыкларны җыю, ташу, куллану, зарарсызлау һәм урнаштыру белән бәйле логистик схемаларның һәм инфраструктур җитештерү объектларының җыелмасы дигән сүз. Монда иң мөһим оештыру институты булып җитештерү һәм куллану калдыклары белән эш итү өлкәсендәге комплекслы бердәм идарә системасы тора, ул исә калдыкларның барлыкка килүе һәм хәрәкәте турында тулы, актуаль һәм ышанычлы белешмәләр булуга нигезләнә.
Артем Сидоров үз докладында әйткәнчә, Экологик министрлыгында Россия Федерациясенең төрле субъектларында калдыклар белән эш итүне оештыру буенча алдынгы тәҗрибә өйрәнелгән һәм шуны Татарстан территориясендә дә иңдерү юллары билгеләнгән. Уңышлылар исәбендә министр “САРИЯ Био-Индастрис Волга” компаниясенең биологик калдыкларга бәйле үзәкләшкән алымын атады. Биологик калдыкларны утильләштерү буенча Алабуга районында төзелгән завод проблеманы Татарстаннан читтә дә Беккари биометрик чокырларыннан (үләт базларыннан) башка гына чишәргә мөмкинлек бирә.
Министрлыкта Идел буе федераль округының башка төбәкләрендәге муниципаль-ара каты көнкүреш калдыклары полигоннарын төзү һәм шуңа бәйле инфраструктураны, калдыклар белән эш итүнең комплекслы идарә системаларын һәм территориаль схемаларын төзү буенча тәҗрибәләр өйрәнелгән. Хәзерге вакытта Татарстан Экология һәм табигый байлыклар министрлыгы республика территориясендә каты коммуналь (көнкүреш) һәм башка куллану калдыклары белән эш итү системасын, шул исәптән бөтен республикада калдыклар әйләнешенең территориаль схемасын әзерләү буенча эш алып бара.
Министрлыкның матбугат хезмәте