Зыян – 1 млн.сумнан артык. Әлмәттә төзелеш калдыкларын законсыз түгелгән
Экология министрлыгының Әлмәттәге Көньяк-Көнчыгыш территориаль идарәсе инспекторлары КамАЗ машинасын экологик җинаять кылуда тоткарладылар. Экологлар килгән вакытта элеккеге «Строитель-2» бакча җәмгыяте территориясендә участокны төзелеш ватыклары калдыклары белән күмү эшләре бара иде. Теркәлгән хокук бозу турындагы мәгълүмат хәзер Россия Эчке эшләр министрлыгының Әлмәт районы бүлегенә тапшырылды. Экологлар исә калдыклар законсыз тупланган территория милекчеләре белән эш итә.
Күчемсез мөлкәтнең бердәм дәүләт реестрыннан алынган белешмәләргә караганда, хокук бозу фактлары физик затныкы, юридик затныкы булган өч җир кишәрлеге һәм муниципаль милектәге бер кишәрлек чикләрендә ачыкланган. Калдыкларны рөхсәтсез ташлауның гомуми мәйданы – 681 кв.м.
Әлмәт районы башкарма комитеты адресына хокук бозуларны булдырмау һәм калдык өемнәрен бетерү кирәклеге турында кисәтү җибәрелде. Юридик затларны административ җаваплылыкка тарту белән Татарстанның табигатьне саклау районара прокуратурасы шөгыльләнәчәк.
Экологлар шулай ук әйләнә-тирә мохиткә китерелгән зыянны да исәпләп чыгардылар. Ул 1 млн.сумнан артык тәшкил итә.