Экологлар көненә Чаллыда яшел эшләр марафоны узды. Битараф булмаган чаллылылар бөтен шәһәр буенча узган өмәләрдә 300 капчык чүп-чар җыйганнар
Татарстан Экологлар көненә багышланган төбәкара экомарафонга кушылды. Чаллыда «Экология» илкүләм проектының «Экосистема: яшел эшләр марафоны» һәм «Россия суы» бөтенроссия экология акциясе кысаларында Кама, Мәләкәс һәм Шилнә елгалары ярларын чистарту узды. Оештыручылар - шәһәр администрациясе белән берлектә ТР Экология министрлыгының Кама буе территориаль идарәсе.
Җыештыруга беренчеләрдән булып Чаллының яшь натуралистлары Дамир Минегалиев һәм Ләйсән Мөхәммәтдинова чыкты: «Шәһәрне чистартырга дип Кама елгасы ярында җыелдык. Барлык халыкны Экологлар көне белән котлыйбыз, без бергә, экология берләштерә бит!»
Битараф булмаган халыкның, активистларның һәм волонтерларның уртак тырышлыгы белән 300 капчык чүп-чар җыелган, шуларның 100 капчыгы пыяла белән, 75е- пластик һәм калганы - сортланмый торган калдыклар.
«Чаллылылар һәрвакыт экологик акцияләргә һәм чараларга актив ярдәм итәләр. Без һәрвакыт Кама елгалары ярларына чыгып чүп-чарларны җыештырабыз, чөнки без шәһәребезнең чисталыгы өчен җан атабыз», - дип уртаклашты 4 нче балалар экология-биология үзәге директоры Владимир Товма.