Нурлат шәһәрендә экологлар һәм «Юл хәрәкәте иминлеге» ДБУ хезмәткәрләре экологик рейд үткәрделәр
Санитар-экология икеайлыгы кысаларында ТР Экология һәм табигать ресурслары министрлыгының Көньяк-Көнчыгыш территориаль идарәсе инспекторлары һәм «Юл хәрәкәте иминлеге» ДБУ хезмәткәрләре юл сервисы объектларының санитар-экологик торышын, Нурлат районы территориясендә гомуми файдаланудагы автомобиль юлларының бүленгән полосасын һәм юл буе полосаларын контрольдә тоту буенча уртак рейд уздырдылар.
«Рейд кысаларында Богдашкино авылында һәм Андреевкада рөхсәт ителмәгән 3 чүплек ачыкланды. Җир кишәрлекләре милекчеләренә табигатьне саклау законнарының мәҗбүри таләпләрен бозуның ярамаганлыгы һәм хокук бозуларны бетерү кирәклеге турында кисәтүләр җибәрелгән,» - дип сөйләде Көньяк-Көнчыгыш территориаль идарәсенең 1 разрядлы белгече Венера Мингалеева.
Исегезгә төшерәбез, 1 апрельдән республикада санитар-экологик икеайлык старт алды. Төп максаты - торак пунктлар территорияләрен санитар чистарту, кышкы чорда җыелган чүплекләрне ачыклау һәм бетерү, территорияләрне тиешле экологик һәм санитар-эпидемиологик хәлгә китерү. Татарстан буенча санитар-экология икеайлыгының өч атнасында министрлыклар һәм ведомстволар тарафыннан 2 089 тәртип бозу ачыкланган, шуларның 1 235 е бетерелгән, 545 административ материал төзелгән, 314,5 мең сумлык штраф салынган. 1 141 рөхсәтсез калдыклар ташлау урыны ачыкланган, 750 урын бетерелгән.
Республика гражданнары тарафыннан ачыкланган хокук бозулар турында мәгълүмат Республика иҗтимагый экология кабул итү бүлмәсенә барлык элемтә каналлары буенча килә. Җәмәгать кабул итү бүлмәсенә 2 027 мөрәҗәгать кергән.
Икеайлык башланганнан бирле муниципаль берәмлекләр 129 мең куб метр каты көнкүреш калдыклары чыгарганнар, территорияләрне чистартуга 227 490 кеше һәм 4 801 махсус техника җәлеп ителгән, 188 меңнән артык агач һәм куак утыртылган, юлларны, тукталыш павильоннарын чистарталар.