Экология министрлыгы инспекторлары тикшергәннән соң, Лениногорскиның каты көнкүреш калдыклары полигоны эшчәнлеге туктатылып тора

Лениногорск районында урнашкан «Благоустройство и озеленение» оешмасының каты көнкүреш калдыклары полигоны үз эшчәнлеген туктатып торырга тиеш. Татарстан Республикасы Югары суды шундый карар кабул итте. Эшчәнлекне туктатып торуның төп сәбәбе – җитештерү һәм куллану калдыклары белән эш итү хокукына лицензия булмау. Әлеге факт рейд барышында Татарстан Республикасы Экология һәм табигый байлыклар министрлыгының Көньяк-Көнчыгыш территориаль идарәсе инспекторлары һәм Татарстан районара табигать саклау прокуратурасы хезмәткәрләре тарафыннан ачыкланды. Моннан тыш, күзәтчелек органнары вәкилләре полигон территориясендә башка закон бозу очраклары да ачыклады. Алар арасында – шәһәр төзелеше эшчәнлеген һәм предприятиеләрне, корылмаларны һәм бүтән төр объектларны эксплуатацияләүне гамәлгә ашырганда, экологик таләпләрне үтәмәү (РФ КоАП 8.1.ст.); Җитештерү һәм куллану калдыклары белән, озон катламын җимерә торган матдәләр белән яки башка куркыныч матдәләр белән эш иткәндә, экология һәм санитария-эпидемиология таләпләрен үтәмәү (РФ КоАП 8.2.ст.).

Полигонның эшчәнлеге барлык закон бозуларны төзәткәнче һәм җитештерү һәм куллану калдыклары белән эш итү хокукына лицензия алганчы туктаталып тора.

ТР ЭТБМ матбугат хезмәте