Мөслимдә яшәүче берәү табигать алдындагы бурычлары аркасында чит илгә чыга алмаячак.

Мөслимдә яшәүче берәүгә, табигать саклау өлкәсендә закон бозгач түләмәгән штрафы өчен, чит илгә чыгуда чикләүләр куелды. 2016 елның маенда ул РФ Административ хокук бозулар кодексының 8.2  маддәсе “Җитештерү һәм куллану калдыклары белән, озон катламын җимерә торган матдәләр яки башка куркыныч матдәләр белән эш иткәндә, экологик һәм санитар-эпидемиологик таләпләрне үтәмәү”, 8.21 маддәсенең 1 өлеше “Атмосфера һавасына зарарлы матдәләр чыгару яки махсус рөхсәтсез аңа зарарлы физик йогынты ясау”, 8.1 маддәсе “Шәһәр төзелеше эшчәнлеген гамәлгә ашырганда һәм предприятиеләрне, корылмаларны яки башка объектларны эксплуатацияләгәндә, экологик таләпләрне үтәмәү” буенча җаваплылыкка тартылган иде. Штрафны вакытында түләмәгән өчен  (РФ Административ хокук бозулар кодексының 20.25 маддәсенең 1 өлеше) 2017 елның январенда Татарстан Республикасының Мөслим суд районы буенча  1нче суд участогы Җәмәгать судьясы 57 яшьлек гражданга карата  хөкем чыгарган иде инде. Гаеплегә 60 сәгатьлек төзәтү эшләре җәзасы билгеләнгән иде. Закон бозучы, суд карары белән килешмичә,  Мөслим районы Шәһәр судына мөрәҗәгать итте. Суд Экология министрлыгының Ык буе ТИ инспекторлары карарын үз көчендә калдырды. Штраф түләү срогы чыкканнан соң, инспекторлар  бурычлыны РФ  территориясеннән чыгуда  вакытлыча чикләү турында карар  чыгару турында гариза бирделәр. Суд приставлары федераль хезмәтенең ТР буенча идарәсенең Мөслим районы Суд приставлары бүлеге Экология министрлыгы шикаятен тулысынча канәгатьләндерде. ТР ЭТБМ матбугат хезмәте