Табигатькә каршы закон бозуның меңнән артык очрагын ачыклау, өч җинаять эше һәм елның иң яхшы инспекторы. Көньяк-Көнчыгыш территориаль идарәсе эшчәнлеге белән бүген экология министры һәм ТР буенча Ростабигать күзәтчелеге җитәкчесе танышты.

Бүген Татарстан Республикасы экология һәм табигый байлыклар министры Фәрит Габделганиев һәм Татарстан буенча Ростабигать күзәтчелеге җитәкчесе Фәрит Хәйретдинов ТР Экология министрлыгының Көньяк-Көнчыгыш территориаль идарәсе эшчәнлеге белән таныштылар. 2016 ел йомгаклары турында идарә башлыгы Альберт Маликов сөйләде. “Табигать саклау законнарын бозуның 1128 очрагы, 3 җинаять эше, 15 миллион сумнан артык штрафлар”, - дип саннарны атады Маликов. Көньяк-Көнчыгыш территориаль идарәсе белгечләре Әлмәттә, Лениногорскида, Бөгелмә, Нурлат һәм Чирмешәндә экологик күзәтчелек алып баралар. 2016 елда идарә инспекторлары тарафыннан 865 тикшерү үткәрелде, табигать саклау законнарын бозуның 1083 факты бетерелде. 156 “кыргый карьер” тикшерелде, калдыкларны урнаштыруның 332 санкциясез урыны ачыкланды, 23 предприятиенең эше туктатылды. 204 эш каралды, бу 2015 елгыдан  44 эшкә күбрәк, шулардан 197 -  министрлык файдасына, дип доклад бирде Альберт Маликов.          Министр Фәрит Габделганиев Көньяк-Көнчыгыш территориаль идарәсе эшчәнлеге нәтиҗәләрен уңай бәяләде. 2017 елда табигать саклау законнарын бозуларны ачыклау буенча эшне дәвам итәргә кирәк, дип билгеләде ул. Экология министрлыгы башлыгы  1 мартка кадәр кече һәм урта бизнес эшмәкәрләренең хуҗалык һәм башка төр эшчәнлек алып бару нәтиҗәсендә калдыклар барлыкка килү, аларны файдалану, зарарсызлау һәм урнаштыру турында хисап тапшырырга тиешлеген искә төшерде. “Бу юнәлештә эшне көчәйтергә һәм бөтен шартларны тудырырга, аерып әйткәндә, консультация ярдәме күрсәтергә кирәк”, - дип күрсәтмә бирде министр. Габделганиевнең күрсәтмәләре арасында тагын - санкциясез чүплекләрне булдырмау буенча чараларны көчәйтергә, атмосфера һавасы халәтенә аерым игътибар бирергә. Ул Су саклау зоналары елында яр буе территорияләрен төзекләндерү буенча гаять зур эш башкарылганын билгеләп үтте. Иң яхшы үрнәкләрдән берсе – масштаблы реконструкциядән соң Әлмәт шәһәре күлендәге туристлык ял итү зонасының ачылуы. Бу эшләр Россиядә Экология елы, ә Татарстанда Экология һәм җәмәгать урыннары елы дип игълан ителгән  2017 елда да дәвам итәчәк, бу елның да өстенлекле юнәлеше табигатькә сакчыл мөнәсәбәт булачак.

ТР ЭТБМ матбугат хезмәте