Идел буенда беренче «Шелл» автоягулык станциясе ачылды
Бүген Казанда иң эре халыкара “Шелл” энергетика компаниясенең Идел буендагы беренче автоягулык станциясе ачылды. Тантанада Татарстан Президенты Рөстәм Миңнеханов, Казан шәһәре мэры Илсур Метшин, “Ядран-Ойл” ЯАҖ директорлар советы рәисе Ирек Салихов, Татарстан экология һәм табигый байлыклар министры Фәрит Габделганиев һәм хөрмәтле кунаклар катнашты. Делегация өчен экскурсияне исә “Шелл”ның Россиядәге автоягулык станцияләре челтәрен оператив үстерү идарәсе директоры Виталий Маслов үткәрде. Аның әйтүенчә, “Шелл”ның Татарстанда беренче автоягулык станциясен “Ядран-Ойл” ЯАҖ компаниясе партнеры төзегән һәм бер атна элек тапшырган. Анда дүрт колонка – сигез ягулык салу посты бар, алар иң соңгы экология һәм янгын куркынычсызлыгы таләпләренә яраштырып җиһазланган. Ягулык сыйфатына зур игътибар бирелә. Сатыла торган барлык ягулык “Евро-5” экология классына карый. Дизель ягулыгы “ТАНЕКО” нефть эшкәртү заводыннан алына. Якын арада Татарстан станцияләрендә сатыла торган барлык ягулык төрләрен җирле җитештерүчеләрдән генә сатып алу ният ителә.
“Шелл” концерны, Татарстандагы “Ядран-Ойл” партнеры белән бергә, 2020 елга кадәр республикада 55 автоягулык станциясе ачарга ниятли. Беренче биш станция Казанда ачылачак (өчесе инде эшли), ел азагынача тагын ике станция Чаллыда ачылыр дип көтелә.
ТР ЭТБМ матбугат хезмәте