Экологлар Милләтләр кроссында катнашты
Татарстан Экология һәм табигый байлыклар министрлыгы хезмәткәрләре, шул исәптән министр Фәрит Габделганиев, 2016 елгы Милләтләр кроссында катнашты. Традицион йөгерешләр Үзәк стадион һәм Цирк янында, Меңьеллык мәйданында үткәрелде. 1 километрлы иң күпсанлы йөгерештә 20 меңнән артык кеше, шул исәптән спорт мәктәпләрендә укучылар, студентлар, спортчылар, спорт ветераннары, оешмаларда эшләүчеләр катнашты.
“Милләтләр кроссы спорт ягыннан гына түгел, социаль яктан да әһәмиятле чара, ул сау тормыш рәвешен пропагандалый, халыкны спорт һәм физкультурага җәлеп итә. Без мондый чараларга инде берничә ел рәттән чыгабыз. Барлык катнашучыларга яхшы кәефләр һәм югары нәтиҗәләр телим”, – диде Фәрит Габделганиев.
Милләтләр кроссы – Россиядә үткәрелә торган иң күләмле спорт чарасы булып тора. Татарстанда ул Казанда гына, ә Россиядә 79 шәһәрдә үткәрелә.
ТР ЭТБМ матбугат хезмәте