«Графика йорты» полиэтилен пакетлар урынына эко-сумкалар кулланырга өнди
Чаллыда, Картиналар галереясының Кече залында Александр Халдеев исемендәге иҗат остаханәсенең “Графика йорты” күргәзмәсе бара, анда төрле басма графикасы техникалары: монотипия, катыргы гравюра, линогравюра, коллаграфия, карборандум белән эшләнгән әйберләр күрсәтелә. Шунда ук “Экосумка” сәнгать-экология проектында да катнашырга мөмкин. Һәр кеше табигый мамык тукымадан ясалган бер сумка сайлап алып, аңа акрил буяулар белән я басма станокта үзенчә бизәк төшерә ала.
“Полиэтилен пакетларның зыяны күп, – ди Татарстан Экология һәм табигый байлыклар министрлыгының Кама буе территориаль идарәсе белгечләре, – Полиэтилен 400-1000 ел эчендә генә таркала. Ә күп кулланышлы эко-сумка күпкә отышлырак: ул җиңел, уңайлы, аны бөтереп кесәгә салып, көтелмәгән әйбер очраганда кулланырга мөмкин. Шуларга күчү планетаның экологик саулыгы өчен көрәштә бер адым булыр иде.”
Күргәзмә 25 сентябрьгә кадәр барачак.
ТР ЭТБМ матбугат хезмәте