Петровский бистәсендә берничә гектар җир фекаль юынтылар белән пычранган
Бүген Татарстан Экология һәм табигый байлыклар министрлыгына Петровский бистәсендә яшәүчеләр якындагы урманнан сасы ис килү турында хәбәр иткән иде. Тиз арада шунда Үзәк махсус аналитик контроль инспекциясе инспекторлары юнәлде. Баштагы версия буенча, пычрак су ерак түгел урнашкан кунакханәнең юынты коесыннан агызылган. 2500 кв.метр җир пычранган. Дәүләти экологик күзәтчелек инспекциясе башлыгы Алмаз Закировның әйтүенчә, пычранган һәм фон туфракларыннан, юынты суның үзеннән пробалар алынган, анализлардан соң материаллар хокук саклау органнарына тапшырылачак. Пычратуда гаеплеләргә РФ КоАП 8.6 ст. (“Җирләрне бозу”) буенча 80 мең сумга кадәр яисә РФ КоАП 8.31 ст. (“Урманнарда санитар куркынычсызлык кагыйдәләрен бозу”) буенча 300 мең сумга кадәр штраф салыначак.
Министрлыкның матбугат хезмәте