Балалар бакчасында экологик агарту шөгыле уздырылды
Татарстан Экология һәм табигый байлыклар министрлыгы белгечләре Лаеш районындагы “Каенкай” балалар бакчасында экологик конкурс, мастер-класс үткәрде, балаларга ел саен 23 июльдә билгеләп үтелә торган Бөтендөнья китлар һәм дельфиннар көне турында сөйләде. Дәүләти экологик күзәтчелек инспекциясе башлыгы Алмаз Закиров Phantom 3 Professional квадракоптерының ничек эшләвен күрсәтте.
Балалар бакчасы янында тәрбиячеләр балалар белән бергә төрле үсемлекләр, чәчәкләр, хәтта бераз яшелчәләр утырткан. Бакча мөдире Юлия Тиханованың әйтүенчә, биредә экологик тәрбиягә зур игътибар бирелә. Шул темага әңгәмәләр, дидактик уеннар, музыкаль чаралар үткәрелә. Күргәзмә әсбаплар да күп кенә. Балалар, ата-аналар белән бергә, агач утыртуда, сыерчык оялары ясауда катнаша.
“Табигать бала күңеленә тирән эз сала, аның тойгыларына күпьяклы һәм динамик йогынты ясый. Шуңа күрә педагоглар, экологлар һәм ата-аналар алдында торган төп бурычларның берсе булып туган якка мәхәббәт, табигатькә сак караш тәрбияләү тора”, – ди экологик белем бирү һәм җәмәгать оешмалары белән бәйләнешләр бүлеге башлыгы Дамир Вәлиуллин.
Министрлыкның матбугат хезмәте