Түбән Аръяк пляжы чистартылды
Казанның “Түбән Аръяк” пляжында күмәк экологик акция үткәрелде. Татарстан Экология һәм табигый байлыклар министрлыгы хезмәткәрләре, Рус географик җәмгыятенең яшьләр төркеме, Алексей Леонов исемендәге су асты фәнни-тикшеренү төркеме әгъзалары, начар ишетүче, “Чикләрне киңәйтеп” проектында катнашучы үсмерләр, “Татарстанның яшь принцессалары” җәмәгать оешмасы вәкилләре яр буйларын җыештырды, су төбен чистартты. Шунда ук Казансу буйлап экологик йөзүдә катнашучылар каршы алынды.
“Чүп-чар азайган, – ди йөзүдән катнашучылар, – күбесенчә халык җиңел бара ала торган урыннар пычранган”.
“Татарстанда үткәрелгән күмәк өмәләрнең нәтиҗәсе инде күренә: катнашучылар күбрәк, ә чүп-чар тулы капчыклар азрак, – дип белдерде Татарстан экология һәм табигый байлыклар министры Фәрит Габделганиев. – Бу быел географлар белән бергә үткәрелгән соңгы акция түгел, якын арада Зөя һәм Вятка елгалары буйлап та экологик марафон уздыру көтелә. Су саклау зоналары елында уртак эшләр күбрәк оештырыла. Мондый чараларга кушылырга теләүчеләр дә көннән-көн арта, димәк, алар арасында инде табигатькә каршылар юк. Бүгенге акциягә җыелучылар үзләрен әйләнә-тирәлекне саклаучылар дип санарга хаклы. Бигрәк тә балаларның, хәтта мәктәп яшенә җитмәгәннәрнең катнашуы сөендерә.”
Министрлыкның матбугат хезмәте