«Саф һава» операциясе. Автотранспортның эко-стандартларга ярашлыгы тикшерелә.

Бер ай элек Татарстанда “Саф һава” операциясе башланган иде. Узган чорда экологлар 800ләр автомобильне тикшерде – 60ы ташландык чыгару нормативларына сыешмый булып чыкты.

ГИБДДның Татарстан идарәсенең, Татарстан Экология һәм табигый байлыклар мини­стрлыгының чираттагы уртак операциясе Югары Ослан районы “Малиновка” постында үткәрелде. “Автотест” газ анализаторы ярдәмендә Экология министрлыгы инспекторлары автомобиль газларындагы пычраткыч матдәләрне (агуларны һәм төтенне) үлчәде.

“Төтен газларында уннарча пычраткыч матдә, бигрәк тә углерод оксиды, углеводо­род­лар, корым, күкерт диоксиды, аммиак, азот оксидлары, формальдегид була. Анда судно моторы ягулыгы матдәләре булуга аеруча игътибар итәбез, чөнки ул ягулыктан зарарлы матдәләр ун тапкыр күбрәк чыга, – дип белдерде ТР Экология министрлыгының Үзәк ТИ башлыгы урынбасары Алмаз Исмәгыйлев.

Экологлар бу юлы РФ КоАП 8.23 статьясы (“Ташландыкларында пычраткыч матдәләр яисә шау-шуы нормативлардан артык булган механик транспорт чараларын эксплуата­ция­ләү”) буенча берничә беркетмә төзеде. Штраф күләме – 500 сум.

Автотранспорттан атмосферага чыгарыла торган пычраткыч матдәләр күләме берничә факторга бәйле:

– юл хәрәкәтен оештыруга (юл хәрәкәтен автоматлаштыру системаларына, транспорт чатлары төзүгә, автомобильләрне табигый газга күчерүгә һ.б.);

– мотор ягулыгының сыйфатына (Татарстанда “ТАИФ-НК” ААҖ һәм “ТАНЕКО” ААҖ берничә ел инде К5 экологик класслы дизель ягулыгы җитештереп сата);

– транспорт чараларының техник торышына.

2015 елда республика предприятиеләрендә һәм автомобиль юлларында 6160 чамасы автомашина тикшерелгән, шулардан 893е (1.45%ы, ә 2014 елда 16.5%ы) төтен газларын­дагы пычраткыч матдәләр нормативларына туры килмәгән.