Экологлар, чумучылар, велосипедчылар, җәмәгать эшлеклеләре һәм кызыксынучылар табигать саклауда берләште
Казанның Киров районындагы Тирән күлне чистарту өмәсенә меңләп кеше – экологлар, җәмәгать эшлеклеләре һәм кызыксынучылар, Экология һәм табигый байлыклар министрлыгы хезмәткәрләре, Рус географик җәмгыятенең Татарстан бүлекчәсе чумучылары, Татарстан Иҗади яшьләр академиясе, Велосипедчылар җәмгыяте вәкилләре, “Чикләрне киңәйтеп” социаль проекты кысаларында чумарга өйрәнүче начар ишетүче үсмерләр чыкты.
Экология министрының беренче урынбасары Рөстәм Камаловның әйтүенчә, Тирән күл һәм аның тирәсендәге катнаш урманнар бик сирәк матурлык, халык яратып ял итә торган урын булып тора. Ул үзе бу кабатланмас табигать почмагын буш шешәләрдән, пакетлардан, бүтән чүп-чардан чистарту чараларында еш катнаша.
Рус географик җәмгыятенең Татарстан бүлекчәсе рәисе Дмитрий Шиллер исә: “Үзен ихтирам итүче кеше табигатькә карата да начарлык эшләми, пычракта яшәми. Бүгенге бу акциягә чыгучылар чиста шәһәрдә яшәргә теләүләрен күрсәтәләр. Өмәләрдә катнашучыларның саны елдан-ел арта, ә җыелган чүп-чар капчыклары саны кими бара”, – дип белдерде.
Министрлыкның матбугат хезмәте