Әлмәт экологлары чүп-чар тауларына тап булды

Татарстан Экология һәм табигый байлыклар министрлыгының Көньяк-көнчыгыш территориаль идарәсе инспекторлары санитар-экологик икеайлык кысаларында үткәрел­гән рейд барышында Әлмәтнең Урау трактында урнашкан “Интернеттрейд” ҖЧҖ терри­ториясендә җитештерү калдыклары өемнәренә тап булды. Предприятие якын-тирәдәге 200 кв.м территорияне дә калдыклар белән пычраткан.

“Без инде территориябезне чистарта башладык, калдыкларны озатырга җыенабыз”, – дип аклана предприятие вәкилләре.

Шуңа да карамастан, экологлар “Интернеттрейд”ка карата ТР КоАП 3.6 статьясы (“Торак җир һәм шәһәр округлары территорияләрен төзекләндерүнең, калдыклар белән эш итүнең муниципаль кагыйдәләрен бозу”) һәм РФ КоАП 8.2 статьясы (“Җитештерү һәм куллану калдыклары, озон катламын җимерүче матдәләр я бүтән куркынычлы матдәләр белән эш иткәндә экологик һәм санитар-эпидемиологик таләпләрне үтәмәү”) буенча административ тикшеренү кузгатты.

Министрлыкның матбугат хезмәте