600ләп кеше «Казан» халыкара аэропортын җыештырырга чыкты
Татарстанның һава капкасы булган “Казан” халыкара аэропортын җыештырырга бу юлы анда эшләүчеләрнең яртысы чыкты. Өмәләр монда еш үткәрелә – хезмәткәрләр һәр атнакичтә үзләренә караган территорияләрне төзекләндерергә чыгалар (бик зур аэропорт зонасы 42 кишәрлеккә бүленгән, һәр службага бер кишәрлек беркетелгән). Гадәт буенча, 1 апрельдән “Чиста атнакич” акциясе башлана, аны беренче карга кадәр үткәрәләр. Аэропортның чисталыгы өчен аның тармаклары гына түгел, монда эшләүче читке оешмалар да җаваплы. Бу юлы территорияләр җыештырылса, киләсе өмәдә бордюрларны буяу күздә тотыла.
“Казан” халыкара аэропортының пресс-секретаре Гадел Гатауллинның әйтүенчә, аэропорт җитәкчелеге әйләнә-тирәлекне тиешле хәлдә тотарга кирәклекне, шуңа бәйле бөтен җаваплылыкны яхшы аңлый һәм чисталыкны тәэмин итү өчен мөмкин булганның барысын да эшли. Татарстан Экология һәм табигый байлыклар министрлыгы белән бергә экологик күзәтчелек башкарыла. Республикада игълан ителгән санитар-экологик икеайлык кысаларында һава портының барлык служба һәм тармаклары, көннең нинди булуына карамастан, өмәләргә чыкмый калмыйлар. Бу өмәләр, чисталыктан тыш, команда рухын югары тотарга да булыша.
Министрлыкның матбугат хезмәте