Өмә аша ЭКОтәрбия Яшьләр күмәк җыештыруга чыкты
Казанның үзәк урамнарының берсе булган Вишневскийда бүген Татарстан Экология һәм табигый байлыклар министрлыгы һәм шәһәр мэриясе ярдәмендә, санитар-экологик икеайлык кысаларында, күмәк җыештыру оештырылды. Өмәгә предприятиеләр, юл службалары, студентлар һәм мәктәп балалары чыкты. Аерым алганда, Казан Энергетика колледжының 1-2 курс студентлары актив катнашты. Тәрбия эше буенча директор урынбасары Светлана Фугинаның әйтүенчә, колледждан барлыгы 50 укытучы һәм укучы чыккан. “Колледж Экология министрлыгы белән күптәннән хезмәттәшлек итә, – ди ул, – без мондый уртак акцияләрдә генә түгел, министрлык оештырган барлык чараларда, конкурсларда бик теләп, кызыксынып катнашабыз. Экологик юнәлешле чаралар гражданлык, туган якны ярату тәрбияләргә булыша. Экологик тәрбия исә булачак белгеченең шәхесен формалаштыру өчен мөһим нәрсә. Быел әле өмәгә беренче генә чыктык, ләкин санитар-экологик икеайлык дәвам итә, анда колледжыбызның барлык студентлары да катнашып өлгерер дип уйлыйбыз.”
Министрлыкның матбугат хезмәте