Юдино бистәсендә законсыз ком чыгаручылар тоткарланды

Татарстан Экология һәм табигый байлыклар министрлыгының Экологик күзәтчелек дәүләт инспекциясе инспекторлары Казан шәһәренең Юдино микрорайонында булып кайтты. Халыктан анда махсус техника белән ком чыгарылу турында хәбәр кергән иде. Факт расланды – РФ КоАП 7.3 статьясы (җир асты байлыкларын лицензиясез куллану) бозылу ачыкланды. Россия МВДсының “Юдино” ОП-4 бүлеге хезмәткәрләре, инспек­торлардан алынган белешмәләр буенча, Юдинодагы Революцион урамдагы индустрия базасы территориясендә чылбырлы тракторны һәм 8 КамАЗ автомобилен тоткарлады. Хәзерге вакытта бу хокук бозуга катнашлы затлар ачыклана, табигатькә салынган зыян исәпләнә.

Исегезгә төшерәбез: тулай таралган файдалы казылмалар законсыз чыгарылу турында Республика иҗтимагый экологик кабулиятенә хәбәр итәргә мөмкин. Кайнар линия телефоны – (843)267-68-67, электрон почта – eco.signal@tatar.ru, хәбәрне “Халык контроле” системасына да җибәрергә була. Табигать саклау законнары бозылу турында фото- я видео-фиксацияле оператив белешмәләр биргән гражданнарга акча түләнә.

Министрлыкның матбугат хезмәте