Санитар-экологик икеайлык башланды
Бүген республиканың табигать саклау службалары, профильлек министрлык һәм тармаклары, предприятие һәм оешмалары, муниципаль берәмлекләре санитар-экологик икеайлык үткәрергә кереште. Экология министрлыгының дәүләти инспекторлары социаль-мәдәни объектларның, сәүдә объектларының, күпләп ял урыннарының, пляжларның, бакчачылык ширкәтләренең, гараж кооперативларының, зиратларның, кар ташу урыннарының, төзелеш калдыклары җыю урыннарының экологик торышын тикшерү максатыннан рейдлар оештырачак. Шулай ук йорт яны территорияләре, юл аеру полосалары, аэропортлар, елга портлары, тимер юл вокзаллары, Горький һәм Куйбышев тимер юллары һәм аларның юл буе территорияләре, яр буйлары контрольгә алыначак. Территорияләрне санитар-экологик чистарту эшләренең координаторы булган Экология министрлыгының төп бурычы булып барлык табигать саклау службалары, профильле министрлыклар һәм тармаклар, предприятиеләр һәм муниципалитетлар белән нәтиҗәле хезмәттәшлек итү тора. Рөхсәтсез калдык ташлау урыннары ачыклану турында Татарстан Экология һәм табигый байлыклар министрлыгының барлык территориаль идарәләре көн саен министрлык җитәкчеләренә ВКС режимында хәбәр итеп торачак. Татарстанның барлык муниципаль районнарында оператив штаблар төзелде. Предприятие һәм оешмаларга конкрет территорияләрне тәртипкә китерү өчен җаваплылык беркетелде. Каты көнкүреш калдыклары полигоннары өстәмә калдыклар кабул итүгә әзерләнде. Республика халкыннан мөрәҗәгатьләр кабул итү системасы эшләнде. Табигать саклау законнары бозылу турында республиканың Иҗтимагый экологик кабулиятенә хәбәр итәргә мөмкин. Аңа (843)267-6867 кайнар телефоны, eco.signal@tatar.ru электрон почтасы, “Халык контроле” дәүләти белешмәләр системасы, “Мәктәп экопатруле” мобиль кушымтасы керә. Табигать саклау законнары бозылу турында фото- я видеофиксацияле оператив белешмәләр бирүче гражданнарга акча түләнә.
Икеайлык кысаларындагы барлык чараларның рәсми хэштегы – #ЭКОяз2016. Республиканы генераль җыештыру “Күңелдә чиста – тирә-якта чиста” шигаре астында уза.
Министрлыкның матбугат хезмәте