Бүген Экология министрлыгының Үзәк территориаль округының 2015 елгы эшләренә йомгак ясалды

Бүген, Татарстан экология һәм табигый байлыклар министры Фәрит Габделганиев катнашында, территориаль идарә җитәкчеләренең күчмә киңәшмәсе булып узды.

Татарстан территориясендә ачыкланган 2 мең рөхсәтсез калдык ташлау урынының яртысы диярлек Казанда, Биектау, Питрәч, Лаеш, Балык Бистәсе, Саба, Теләче, Яшел Үзән һәм Югары Ослан районнарында экологик күзәтчелек алып баручы Үзәк территориаль идарәгә туры килә. Узган ел йомгаклары буенча идарә бетерелгән чүплекләр буенча алдынгы урында тора (99%). Идарә башлыгы биргән хисапка караганда, 2015 елда Үзәк идарә инспекторлары 3429 тикшерү үткәреп, табигать законнары бозылуның 2298 очрагын ачыклаган. 9.5 миллион сум тирәсе штрафлар салынган, якынча 37 миллион сумлык 19 дәгъва белдерелгән.

Экология министры Фәрит Габделганиев, 2016 елга бурычлар исәбеннән, су саклау зоналарындагы җир кишәрлекләрен һәм урманнарны куллану өлкәсендәге бозуларны ачыклау эшен көчәйтергә һәм атмосфера һавасы торышына аерым игътибар итәргә кушты, “Генерация компаниясе” ААҖ белән берлектәге, атмосфера һавасына зарарлы матдәләр чыгару күләмен киметүгә юнәлтелгән уңай эшчәнлекне билгеләп үтте.

Министрлыкның матбугат хезмәте