Казанда беренче электромобильләр туендыру станциясе барлыкка килде
Казанның Восстание урамында (“Химград” технополисы территориясендә) электромобильләрне туендыру һәм транспортка традицион углеводород ягулыгы салу буенча Татарстанда беренче станция эшли башлады. 24 кВт/сәг күләмле аккуммуляторны 30%тан 80%ка кадәр туендыру вакыты – 15 минут. Көндез станция ярым автоматик режимда, ә 19.00дән 7.00гә кадәр автоматик режимда, операторсыз эшли. Беренче вакытта электромобильләрне түләүсез туендырырга мөмкин булачак. Россиядә беренче электромобиль туендыру станциясе 2012 елда барлыкка килгән иде.
Электротранспорт әйләнә-тирәлек өчен иң чиста һәм куркынычсыз транспорт төре булып тора. Эре шәһәрләрдә һәм индустриаль төбәкләрдә атмосфера һавасын пычратуда бензинлы һәм дизельле автотранспортның өлеше 70-80% тәшкил итә.
Министрлыкның матбугат хезмәте