Августта республика халкыннан табигать саклау законнарын бозу теркәлгән 23 мөрәҗәгать керде

Татарстан Экология һәм табигый байлыклар министрлыгына 2015 елның 13 августында Фучик ур. 62 адресында рөхсәтсез калдыклар ташлау турында видеофиксацияле хәбәр килде. Казан кешесе бер хатын-кызның чүп-чар тулы капларны ташлавын видеога төшергән. Материал Министрлыкның Үзәк территориаль идарәсенә тапшырылды. Инспекторлар, административ тикшерү үткәреп, бозучының кемлеген ачыклады. Видеода 10нчы микрорайон тукталышы төбәгендә урнашкан базар сатучысы теркәлгән. Аңа карата РФ КоАП 8.2 статьясы буенча, җитештерү һәм куллану калдыклары белән эш иткәндә экологик һәм санитар-эпидемиологик таләпләрне үтәмәү турында беркетмә төзелде.

Конкрет хокук бозуны яки транспорт чарасын теркәп мәгълүмәт биргән гражданнарны матди кызыксындыру Татарстан Экология һәм табигый байлыклар министрлыгы тарафыннан табигать саклау законнарын бозуларга каршы көрәшнең нәтиҗәлелеген күтәрү максатыннан эшләнә. Түләү Татарстан бюджеты исәбенә “2014-2020 елларда ТРда әйләнә-тирәлекне саклау, табигый ресурсларны яңадан торгызу һәм куллану” дәүләт программасы кысаларында, Министрлыкка билгеләнгән чаралар чикләрендә башкарыла. Җитештерү һәм куллану калдыкларын ташлау, карьерларны законсыз казу (киң таралган файдалы казылмаларны лицензиясез чыгару) фактларын теркәүдә ярдәм иткән әлеге гражданнар 5 эш көне эчендә 1000әр сум алачак. Бу системаны кертү төп көчләрне теге я бу җинаятьне кылган затларны ачыклауга һәм җәза билгеләүгә турыдан-туры юнәлтергә мөмкинлек бирә.

Хокук бозуларны теркәүдә ярдәм eco.signal@tatar.ru электрон почтасына, Министрлыкның http://eco.tatarstan.ru/rus/priem.htm интернет кабулиятенә мөрәҗәгать итеп яисә Министрлыкка үзең килеп, хокук бозу фактының видеосын һәм фотосын кушымталап башкарыла.

Мөрәҗәгать итүгә таләпләр һәм түләү тәртибе турында тулырак белешмәләр Татарстан Экология һәм табигый байлыклар министрлыгының eco.tatarstan.ru сайтының “Дәүләти экологик күзәтчелек” бүлегендә (http://eco.tatarstan.ru/rus/poryadok-osushchestvleniya-viplat-grazhdanam.htm).

1 августтан алып Татарстанда Казан, Чаллы, Әлмәт, Алабуга, Буа, Чистай шәһәрләрен­дә, Яңа Чишмә, Чирмешән районнарында яшәүчеләрдән 23 мөрәҗәгать керде, 8 гражданга түләү башкарылды.

Министрлыкның матбугат хезмәте