Идел аръягы территориаль идарәсе инспекторлары законсыз ком чыгаруга чик куйды

2015 елның 1 мартында Татарстан Экология һәм табигый байлыклар министрлыгының Идел аръягы территориаль идарәсе инспекторлары Буа районындагы кыргый карьерларны тикшерү максатыннан төнге рейд оештырды. Аның барышында Буадан 1 км көнбатышта урнашкан карьерны законсыз казу факты ачыкланды. Җир асты байлыкларыннан ярашлы лицензиясе булмаган килеш файдаланган өчен хосусый эшмәкәр И.И.Гыймадиевка карата 7.3 статьяның 1 өлеше буенча беркетмә төзелде.

Карьерларны рөхсәтсез казу урыннарын оперативрак табу өчен Татарстан Экологик һәм табигый байлыклар министрлыгы берничә электрон сервисны – гражданнар мөрәҗәгатьләрен электрон почтага һәм мобиль коммуникация җайланмаларына икеяклы элемтә белән кабул итүне оештырды. Гражданнар законсыз казу урыннары турында 267-68-67 кайнар линиясенә һәм eco.signal@tatar.ru электрон почтасына хәбәр итә ала. Карьерда кулланылган техниканың маркасын һәм номерын, эшләрнең ориентирларга бәйләп төгәл урынын, вакытын һәм датасын, кире адресны әйтергә кирәк. Анонимлык гарантияләнә.

Министрлыкның матбугат хезмәте