Казанда Татарстан Экология министрлыгының һәм Россия Табигать күзәтчелеге идарәсенең берлектәге йомгаклау коллегиясе утырышы булып узды

Бүген Казанда, Татарстан Президенты Рөстәм Миңнеханов катнашында, Татарстан Экология һәм табигый байлыклар министрлыгының һәм Табигатьтән файдалану өлкәсендә күзәтчелек федераль службасының Татарстан буенча идарәсенең берлектәге йомгаклау коллегиясенең 2014 елгы эш йомгакларына һәм 2015 елга бурычларга багышланган берлектәге утырышы булып узды. Төп докладлар белән Татарстан экология һәм табигый байлыклар министры Артем Сидоров һәм Табигатьтән файдалану өлкәсендә күзәтчелек федераль службасының Татарстан буенча идарәсе җитәкчесе Фәрит Хәйретдинов чыгыш ясады. Экология министры докладының тексты белән Министрлык сайтының “Матбугат хезмәте – Рәсми чыгышлар” бүлегендә таныша аласыз.
Табигать саклау тармакларының эшен бәяләп, Татарстан Президенты Рөстәм Миңнеханов: “Татарстан Экология һәм табигый байлыклар министрлыгының һәм Табигатьтән файдалану өлкәсендә күзәтчелек федераль службасының Татарстан буенча идарәсенең эшчәнлеге федераль дәрәҗәдә югары бәяләнә. Республикада корылган система, тармакларда булган белгечләр һәм лаборатор-техник җиһазлар бөтен хәл-әхвәлне он-лайн режимда күзәтергә һәм тиешле чаралар күрергә мөмкинлек бирә”, – дип белдерде. Шулай ук быелгы Су спорты төрләре буенча XVI дөнья чемпионаты дәверендә Казан шәһәренең санитар-экологик куркынычсызлыгын тәэмин итү бурычын куйды, 2013 елгы Универсиаданы әзерләү һәм үткәрү көннәрендәге эшләрнең уңышлы булуын, уңай әйләнә-тирәлек булдыруга Парклар һәм скверлар елы кысаларында үткәрелгән чараларның да ярдәм итәчәген ассызыклады.
Министрлыкның матбугат хезмәте