Экология министрлыгында карьерлардан рөхсәтсез файдалану урыннарын оператив табу буенча кайнар телефон линиясе эшли башлады

Бүген Татарстан Экология һәм табигый байлыклар министрлыгында министр урынбасары, Татарстанның табигать саклау буенча баш дәүләт инспекторы Рәмил Низамов катнашында брифинг уздырылды.
Рәмил Низамовның хәбәр итүенчә, карьерлардан рөхсәтсез файдалану урыннарын оперативрак табу өчен Министрлык гражданнарның мөрәҗәгатьләрен электрон почтага мобиль телефон сервисына кабул итә башлаган. 2014 елның 18 декабреннән гражданнар законсыз карьер казулар турында 267-68-67 кайнар телефонына һәм eco.signal@tatar.ru электрон почтасына хәбәр итә алалар. Хәбәр иткәндә карьерда кулланылучы техниканың маркасын һәм номерын, анык ориентирларга бәйләп аның төгәл эшләү урынын, ул техника эшләгән датаны һәм вакытны әйтергә кирәк. Анонимлык гарантияләнә.
Хәзерге вакытта Татарстан территориясендә 170 предприятиенең җирле әһәмияттәге җир асты байлыкларыннан файдалануга 277 гамәлдәге лицензиясе бар. 2014 елда җирле әһәмияттәге җир асты байлыкларыннан файдалануга лицензия шартларын бозган өчен Министрлык инспекторлары 35 шундый лицензиянең гамәле туктатты һәм 7 лицензияне юкка чыгарды.
Быел тулаем республика буенча җир асты байлыкларыннан файдалану турындагы закон таләпләрен бозуның 156 очрагы ачыкланды, шулар буенча 149 административ хокук бозу беркетмәсе төзелде, барлыгы 9 миллион 67 мең сумлык штрафлар салынды, җир асты байлыкларыннан файдаланучы 22 предприятиенең 35 лицензиясе туктатылды. Россия Федерациясенең җир асты байлыклары турындагы законнарын бозуның 27 факты буенча 254 миллион 652 мең сумлык зыян исәпләнде. Шулар буенча материаллар хокук саклау органнарына юнәлтелеп, 4 җинаять эше кузгатылды, алар буенча исәпләнгән зыян 136 миллион 113 мең сум тәшкил итә.
2014 елдан башлап киң таралган файдалы казылмаларны законсыз чыгаруны кисәтү һәм булдырмау буенча региональ дәүләт күзәтчелеге республиканың прокуратура һәм хокук саклау органнары белән тыгыз бәйләнештә алып барыла. Мәсәлән, елга акваторияләрендә прокуратура һәм МВД белән берлектә 16 махсус рейд үткәрелеп, киң таралган файдалы казылмаларны рөхсәтсез чыгаруның 76 урыны тикшерелде һәм андый файдалану туктатылды.
Татарстан Экология һәм табигый байлыклар министрлыгы тәкъдиме белән, Тармак-ара дәүләти финанс контроле мәсьәләләре буенча координацион совет кысаларында, Татарстан территориясендә карьерлардан законсыз файдалануны ачыклау һәм булдырмау максатларында, республикада даим эшләүче контроль группасы төзелде.
Министрлыкның матбугат хезмәте