Экология министрлыгында Татарстан Хөкүмәте белән «Яшел Россия» иҗтимагый экологик хәрәкәте арасында килешүгә кул куелды

Экология министрлыгында Татарстан Республикасы Хөкүмәте белән “Яшел Россия” бөтенроссия иҗтимагый экологик хәрәкәте арасында килешүгә кул куелды. Кул куючылар – Татарстан Премьер-министрының беренче урынбасары Алексей Песошин һәм “Яшел Россия” рәисе Константин Курченков.
“Яшел Россия” бөтенроссия өмәсендә иң актив катнашучыларны бүләкләү тантанасы да булып узды, аны Константин Курченков һәм Россия Дәүләт Думасы депутаты Анатолий Карпов алып барды.
Тантанада Татарстан экология һәм табигый байлыклар министры Артем Сидоров чыгыш ясады. “Республиканың экологик куркынычсызлыгына зур игътибар бирелә, һәм андый эшләр җәмәгать оешмалары белән тыгыз бәйләнештә алып барыла. Бөтенроссия өмәсе кебек глобаль акцияләр үткәрү җәмгыятебезнең җитлеккәнлеге, югары экологик культурасы һәм гражданлык позициясе турында сөйли. Бездә шулай ук социаль-экологик юнәлешле иҗат конкурслары, фәнни-популяр семинарлар, яшьләр форумнары, республиканың барлык мәктәпләрендә квартал саен “чисталык дәресләре” үткәрелә, аларда иҗтимагый экологик оешмаларның педагогик эшкә әзерлекле активистлары катнаша”, – дип белдерде экология министры. Һәм арытаба “Җәмәгать инспекторлары”, “Мәктәп эко-патруле”, “Халык контроле” кебек социаль проектларны, республика яшьләренең “Саф караш” социаль экологик реклама конкурсын искә алды, барлык катнашучыларга актив эшчәнлекләре өчен рәхмәт белдерде.
Министрлыкның матбугат хезмәте