Бүген – Казан Федераль университетының кулланма экология кафедрасы мөдире Венера Латыйпованың юбилее

Бүген Казан Федераль университетының кулланма экология кафедрасы мөдире, химия фәннәре докторы, профессор, Россия экология академиясе академигы, Татарстан Фәннәр Академиясе Президиумы каршындагы Экология проблемалары буенча фәнни совет рәисе, Татарстан Фәннәр Академиясенең әгъза-корреспонденты Венера Латыйпова юбилеен билгеләп үтә.
Татарстан экология һәм табигый байлыклар министрының беренче урынбасары Рөстәм Камалов, министр Артем Сидоров исеменнән, аңа әйләнә-тирәлекне саклау буенча күпьеллык тырыш хезмәтләре, Татарстанның экологик куркынычсызлыгын тәэмин итү өлкәсендә уңышлы хезмәттәшлек итүе һәм җәмәгатьчелек хәрәкәтен аякка бастыруда ирешкән нәтиҗәләре өчен Мактау грамотасы тапшырды.
Венера Латыйпова шулай ук Татарстан Экология һәм табигый байлыклар министрлыгының Фәнни-техник советы әгъзасы һәм Коллегия әгъзасы, “Экологик һәм индустриаль куркынычсызлык”, “Теоретик һәм кулланма экология” журналларының редколлегия әгъзасы, Татарстан Сәүдә-индустрия палатасы каршындагы Куркынычлы калдыклар буенча комиссиянең фәнни консультанты булып тора.
Венера Латыйпованың фәнни интереслар өлкәсе – экология, экологик нормалаштыру, табигать системаларының биогеохимиясе, экологик мониторинг. Ул экология һәм табигатьтән файдалану өлкәсендә шактый зур фәнни нәтиҗәләргә ирешкән галим булып тора. Аның тарафыннан, беренче буларак, биоген миграциягә кушылган микроэлементларның сайланма йотылуы микъдар ягыннан тасвирланды, төрле типтагы су экосистемаларында матдәләр һәм энергия күчешләре өйрәнелде. Аның фән һәм практикага керткән тагын бер зур өлеше – су һәм җир экосистемаларына антропоген йөкләнешне экологик нормалаштыру. Ул шулай ук Урта Иделнең эре сусаклагычлары экологиясе, калдыклар полигоннары, биологик чистарту корылмалары, нефть районнары экологиясе буенча да зур хезмәтләр башкарды.
Венера Латыйпов төзегән методикалар калдыкларның куркынычсызлык классын билгеләү буенча Россия Табигый байлыклар һәм экология министрлыгы тарафыннан расланган, хәзер Татарстанның һәм Россиянең табигать саклау практикасында киң кулланыла торган эксперименталь методка нигез булып торды. Ул шулай ук Татарстанның 2007-2015 еллардагы Экологик куркынычсызлыгы концепциясен эшләүгә җитәкчелек итте.
Казан Федераль университетының Венера Зиннәтовна 20 ел буена җитәкләгән Кулланма экология кафедрасы Татарстан Экология һәм табигый байлыклар министрлыгының төрле тармакларында, республиканың фәнни оешмаларында һәм предприятиеләрнең табигать саклау службаларында эшләүче югары квалификацияле белгечләр әзерләү белән уңышлы шөгыльләнә.
Министрлыкның матбугат хезмәте