Экология министрлыгында республика территорияләрен санитар чистарту декадасы йомгакларына багышланган брифинг үткәрелде

Бүген Татарстан Экология һәм табигый байлыклар министрлыгында Татарстан муниципаль берәмлекләре территорияләрен санитар-экологик чистарту декадасы (8-18 октябрь) йомгакларына багышланган брифинг булып узды. Журналистларның сорауларына экология һәм табигый байлыклар министры урынбасары, Татарстаның табигать саклау буенча баш дәүләт инспекторы Рәмил Низамов, Татарстан Экология һәм табигый байлыклар министрлыгының Үзәк территориаль идарәсе башлыгы Илһам Сабиров, Министрлыкның экологик агарту һәм җәмәгать оешмалары белән бәйләнешләр бүлеге башлыгы Дамир Вәлиуллин җавап бирде.
Декада көннәрендә республиканың барлык муниципаль районнары декада үткәрү уңаеннан тиешле күрсәтмәләр, карарлар чыгарган, оператив штаблар төзелгән, предприятие һәм оешмаларга территорияләр беркетелгән. Эшкә уку йортлары, җәмәгать оешмалары, халык җәлеп ителгән. Аеруча игътибар паркларны, скверларны, ишегалларын һәм балалар мәйданчыкларын, азык-төлек һәм әйбер базарларын, халык күпләп ял итә торган урыннарны, гараж кооперативлары һәм шәхси торак секторы территорияләрен чистартуга юнәлтелгән.
Муниципаль берәмлекләр декада чорында 142 мең 821 кубометр каты көнкүреш калдыгы чыгарганнар, эшкә 197 мең 82 кеше, 2 мең 717 техника берәмлеге җәлеп ителгән, 188 мең 975 агач һәм 41 мең 568 куак утыртылган. Региональ әһәмияттәге юл буйларыннан 3 376 тонна чүп-чар; федераль әһәмияттәге юл буйларыннан 720 тонна чүп-чар җыелган.
Күзәтчелекне көчәйтү кысаларында тулаем республика буенча 837 бозу очрагы ачыкланган, нәтиҗәләре буенча 539 беркетмә төзелгән, барлыгы 4 375.2 мең сумлык штрафлар салынган.
Декада башыннан алып барлык табигать саклау органнары һәм муниципалитетлар көче белән 358 рөхсәтсез калдык ташлау урыны ачыкланган, 297се бетерелгән, бу 83% тәшкил итә.
Казан шәһәр башкарма комитеты полигоннарга 50 мең кубометрдан артык чүп-чар чыгарткан, 3837 ишегалды җыештырылган, 36.5 мең агач һәм 832 куак утыртылган.
Декада башыннан алып Үзәк территориаль идарә инспекторлары 48 рөхсәтсез калдык ташлау урынын ачыклаган, 39 чүплек бетерелгән, бу 80% тәшкил итә.
Министрлыкның матбугат хезмәте