«Чисталык дәресе» Халыкара Озон катламын саклау көненә багышланды

Бүген Татарстанның гомуми белем бирү оешмаларында Халыкара Озон катламын саклау көненә багышланган “Чисталык дәресе” экологик агарту акциясе үткәрелде. Аны Татарстан Мәгариф һәм фән министрлыгы белән берлектә, Татарстанның муниципаль районнары һәм шәһәр округлары хакимиятләре белән хезмәттәшлек итеп, Татарстан Экология һәм табигый байлыклар министрлыгы оештырды. Дәресләрне федераль һәм республика башкарма хакимият органнарының – Татарстан Экология һәм табигый байлыклар министрлыгының, Татарстан Урман хуҗалыгы министрлыгының, Татарстан буенча Россия табигать күзәтчелеге идарәсенең, Татарстан буенча Россия авыл хуҗалыгы күзәтчелеге идарәсенең табигать саклау тармаклары хезмәткәрләре, республика югары уку йортларының профильле факультетлары укытучылары үткәрде.
Акциянең үзәк мәйданы булып “Зәңгәр күлләр” аеруча саклаулы табигать территориясе торды. Дәресне Рус география җәмгыятенең региональ бүлекчәсе һәм Татарстан Фәннәр Академиясе каршындагы Экология һәм җир асты байлыкларыннан файдалану проблемалары институты хезмәткәрләре белән берлектә министр урынбасары – Татарстанның баш дәүләти табигать саклау инспекторы Рәмил Низамов үткәрде. Алар су төбенә төштеләр, К(И)ФУның ИТ-лицее укучыларын республикадагы уникаль табигать объектлары белән таныштырдылар. Тагын бер күчмә дәрес “Чиста шәһәр” бренды астында эшләүче ПЖКХ компаниясе территориясендә үткәрелде. Җитештерү һәм куллану калдыклары белән эш итү бүлеге башлыгы Рөстәм Богданов, Экологик агарту һәм җәмәгать оешмалары белән хезмәттәшлек бүлеге башлыгы Дамир Вәлиуллин Казанның 48нче мәктәбе укучыларына чүп-чарны үз вакытында сортлау, җитештерү һәм куллану калдыкларының куркынычлыгы, калдыклар белән бәйле проблемаларны чишү юллары турында сөйләделәр.
Бу акциянең яңалыгы булып укучыларны республиканың яңа “Мәктәп эко-патруле” тармак-ара конкурсы белән таныштыру торды.
Бүген “Чисталык дәресләре” Татарстанның 850дән артык гомуми белем бирү оешмасында үткәрелде. Әйләнә-тирәлекнең торышы һәм аны саклау турында белешмәләр белән кече, урта һәм өлкән яшьтәге 12 меңнән артык мәктәп баласы танышты. Аларга экология буенча күп кенә кызыклы һәм мавыктыргыч сораулар бирелде, җаваплар алынды.
Чараның максаты – республикада яшәүче яшь буында экологик белемнәр тарату, табигый байлыкларга һәм әйләнә-тирәлеккә җаваплы караш тәрбияләү, экологик үзаң формалаштыру, Татарстан Республикасында өзлексез экологик белем һәм тәрбия бирү системасын яклау һәм үстерү.
Министрлыкның матбугат хезмәте