Экология министрлыгында «Мәктәп эко-патруле» кушымтасын кую һәм эшләтү буенча он-лайн өйрәнү үткәрелде

Бүген Татарстан Экология һәм табигый байлыклар министрлыгында Министрлык хезмәткәрләре өчен “Мәктәп эко-патруле” кушымтасын кую һәм видеоэлемтә режимында эшләтү буенча өйрәнү үткәрелде. Проект Татарстан Информатизация һәм элемтә министрлыгы, Татарстан Мәгариф һәм фән министрлыгы белән берлектә республиканың гомуми белем оешмалары өчен әзерләнгән. Конкурсның идеясе шунда ки – мобиль телефоны булган һәр укучы буш вакытында чүплекләрне фотога төшереп, колл-үзәк фильтры аша тапшыра алырга тиеш, ә анда һәр укучы, класс, мәктәп, муниципалитет буенча статистика формалашачак.
Кушымта iOs һәм Android идарәсендәге җайланмалар өчен эшләнгән, аңа AppStore һәм Play Market аша да кереп була. Кушымтада авторлашу өчен укучыга “Электрон мәгариф” edu.tatar.ru порталында кулланыла торган логин һәм пароль кертергә һәм “Керү” кнопкасына басарга, аннары рөхсәтсез калдыклар ташлау урыны төшерелгән фотоны яисә 1 минут чамасы озынлыктагы ачык рәвештәге видеоны “Җибәрү” кнопкасы аша салырга кирәк. Бозу урыны автомат рәвештә билгеләнә.
Иң күп белешмәләр җибәргән актив укучылар уку елы азагында кыйммәтле призлар белән бүләкләнәчәк.
Министрлыкның матбугат хезмәте