Татарстан нефть-газ химиясе форумы ачылды

Казанда Татарстан нефть-газ химиясе форумы эшли башлады, ул “Казан ярминкәсе” күргәзмә үзәге мәйданчыгында уза. Форумны ачу тантанасында Татарстан Республикасы Президенты Рөстәм Миңнеханов, Россия Федерациясе энергетика министры урынбасары Кирилл Молодцов, Экологик, технологик, атом күзәтчелеге буенча федераль служба җитәкчесе урынбасары Светлана Родионова, Төрекмәнстан Министрлар Кабинеты рәисе Баймырат Хуҗамөхәммәдов, Татарстан индустрия һәм сәүдә министры – вице-премьер Равил Зарипов, Татарстан экология һәм табигый байлыклар министры Артем Сидоров, Татарстан министрлыклары һәм тармаклары җитәкчеләре катнашты.
Быел Татарстан нефть-газ химиясе форумы кысаларында “Нефть, газ. Нефть химиясе”, “XXI гасыр экотехнологиясе һәм җиһазлары”, “Пластик & каучук” “GEO-КАЗАН: Геологик эзләнүләр. Геодезия. Картография” дигән дүрт тармак күргәзмәсе үткәрелә. Эшлекле программа кысаларында исә 5 сентябрьдә “Индустриаль экология һәм куркынычсызлык” дигән IX Төбәк-ара фәнни-гамәли конференция үткәреләчәк, аны Татарстан Экология һәм табигый байлыклар министрлыгы оештыра. 3-5 сентябрьдә шулай ук “Углеводородларның авыр чыгармалы һәм традицион булмаган хәзинәләре: тәҗрибә һәм прогнозлар”, “Индустриаль экология һәм куркынычсызлык” “Нефть химиясе һәм нефть эшкәртү тармакларының төп үсеш тенденцияләре”, “Геодезия һәм геоинформация системаларының актуаль мәсьәләләре”, “Сыеклык һәм газлар чыгымын һәм микъдарын үлчәүне метрологик тәэмин итүнең актуаль мәсьәләләре”, “Индустриаль автоматлаштыру-2014” дигән темаларга берничә халыкара һәм төбәк-ара конференция үткәреләчәк.
Форум 5 сентябрьгә кадәр эшли.
Министрлыкның матбугат хезмәте