Түбән Кама индустриаль узелының экологик куркынычсызлыгын тәэмин итү буенча тармак-ара эш төркеме утырышы булып узды

Татарстан экология һәм табигый байлыклар министры Артем Сидоров һәм Түбән Кама муниципаль районы башлыгы Айдар Метшин “Түбән Кама муниципаль районының әйләнә-тирәлеген саклау” озайлы максатчан республика программасы кысаларында тормышка ашырылучы чараларны тикшерделәр. Түбән Камада 2014 елның 25 августында экологик куркынычсызлыкны тәэмин итү буенча тармак-ара эш төркеме утырышы булып узды. Эш төркеме әгъзалары анда “Түбән Кама-нефтехим” ААҖнең 2014-2020 елларга яңа экологик программасын, “ТАИФ-НК” ААҖнең табигать саклау чараларын һәм мотор ягулыгы парларын рекуперацияләү технологиясен иңдерү мәсьәләләрен карадылар.
Бүген Түбән Камада атмосфера сыйфатына мониторинг 4 автоматик контроль постында ясала. Билгеләнгән график буенча шәһәр буйлап “FORDTransit” автомобиле базасындагы күчмә аналитик лаборатория йөри, ул да атмосфера параметрларын автоматик рәвештә үлчи. Постлардан һәм күчмә лабораториядән алынган белешмәләр он-лайн режимда Экология министрлыгының мониторинг үзәгенә бирелә. Автоматик системага өстәмә рәвештә Түбән Камада заманча химик анализ контроле лабораториясе дә эшли. Лаборатория белгечләре көн саен шәһәрнең киеренке нокталарында һава пробалары алып анализлыйлар. Экология министрлыгы һәм Россия Табигать саклау идарәсе предприятиеләргә планлы тикшерүләр үткәрә, бу исә табигать саклау законнарын бозуны кисәтергә мөмкинлек бирә.
Экология министрының әйтүенчә, көнкүреш һәм индустрия түгентеләрен чистарту проблемасы чишелмәгән әле. Шәһәрнең яңгыр канализациясен файдалану буенча да сораулар бар. Биш ел эчендә “Түбән Кама-нефтехим” ААҖның чистарту корылмаларына реконструкция ясау күздә тотыла, бу Кама елгасына чистартылмаган юынтылар агызуны бетерергә мөмкинлек бирәчәк. Гамәлдәге индустриаль калдыклар полигонын реконструкцияләү инде башланган.
Киңәшмәдә шулай ук Түбән Камада экологик куркынычсызлык мәсьәләләрен оператив чишү максатында шәһәрнең барлык предприятиеләре вәкилләреннән торган җәмәгать советы төзергә тәкъдим ителде.
Министрлыкның матбугат хезмәте