«Каты көнкүреш калдыклары полигоны», «Төзекләндерү һәм Яшелләндерү» җәмгыятьләрендә бозулар ачыкланды

Татарстан Экология һәм табигый байлыклар министрлыгының Көньяк-Көнчыгыш территориаль идарәсе инспекторлары, Татарстан районара табигать саклау прокуратурасы хезмәткәрләре белән берлектә, Бөгелмә районы Березовка авыл җирлеге территориясендә урнашкан, “Полигон ТБО” ҖЧҖ милкендә булган полигонда каты көнкүреш калдыкларын туплау, күмү һәм утильләштерү өлкәсендә табигать саклау законнарының үтәлешен планнан тыш тикшерүгә бардылар.
Дәүләти экологик күзәтчелек нәтиҗәләре буенча әйләнә-тирәлекне саклау өлкәсендә берничә закон бозу ачыкланды. Аерым алганда, “Әйләнә-тирәлекне саклау турындагы”, “Җитештерү һәм куллану калдыклары турындагы” федераль законнар, “Җитештерү һәм куллану калдыкларын урнаштыруга һәм зарарсызлауга гигиеник таләпләр” дигән Санитар-эпидемиологик Кагыйдәләр һәм нормативлар бозылган.
Полигон территориясендә предприятиеләрне, корылмаларны һәм башка объектларны эшләткәндә экологик таләпләр, җитештерү һәм куллану калдыклары белән эш иткәндә экологик һәм санитар-эпидемиологик таләпләр үтәлми, 3нче класс куркынычлы калдыкларны вакытлыча саклау урыннары корылмаган, җитештерү һәм куллану калдыкларын туфракка ташлауга юл куелган.
Көньяк-Көнчыгыш территориаль идарә белгечләре, Татарстан районара табигать саклау прокуратурасы белән берлектә, шулай ук Лениногорск шәһәреннән 6 км.да урнашкан “Төзекләндерү һәм Яшелләндерү” җаваплылыгы чикләнгән җәмгыятенең каты көнкүреш калдыклары полигонына да планнан тыш тикшерүгә бардылар.
“Төзекләндерү һәм Яшелләндерү” ҖЧҖ полигонына дәүләти экологик күзәтчелек нәтиҗәсендә “Әйләнә-тирәлекне саклау турындагы”, “Атмосфера һавасын саклау турындагы”, “Җитештерү һәм куллану калдыклары турындагы” федераль законнарны бозулар ачыкланды. Территориядә җитештерү һәм куллану калдыклары туфракка ташлана, якын-тирә территориядә калдыклар аунап ята, полигон эшчеләре эре габаритлы калдыкларны яндыралар.
Планнан тыш тикшерү нәтиҗәләре буенча материаллар прокурорлык реакциясе чаралары күрү өчен Татарстан районара табигать саклау прокуратурасына юнәлтелде.
Татарстан Экология һәм табигый байлыклар министрлыгының Көньяк-Көнчыгыш территориаль идарәсе материаллары буенча
Министрлыкның матбугат хезмәте