Экология министры Артем Сидоров: «Олимпиадада катнашучыларның күбесе якын киләчәктә безнең коллегалар булыр дип өметләнәбез»

Бүген Казанда, “Пирамида” мәдәният-күңел ачу комплексында, мәктәп укучыларының Экология буенча бөтенроссия олимпиадасында җиңүчеләрне тәбрикләү тантанасы булып узды. Анда Татарстан Премьер-министры урынбасары – Мәгариф һәм фән министры Энгель Фәттахов та катнашты.
Тантанада тәбрикләү сүзе белән Татарстан Экология һәм табигый байлыклар министры Артем Сидоров чыгыш ясады. Ул Олимпиаданы оештыручыларга һәм анда катнашучыларга активлык, максатчанлык, туган як табигате белән борчылганлык өчен, ә педагогларның һөнәри җәмгыятенә сәләтле балаларны үстерү өстендә эшләгән өчен рәхмәт белдерде. “Бүген кеше тормышының бер генә өлкәсен дә әйләнә-тирәлекне саклау мәсьәләләреннән башка күзаллап булмый. Табигатькә мөнәсәбәт, беруңайдан, җәмгыятебезнең җитлегү дәрәҗәсен, сыйфат үзгәрешләренә сәләтен дә билгели. Олимпиадада катнашып әле бу залда утыручыларның күбесе якын киләчәктә безнең коллегалар, тормышын экологиягә багышлаучылар булып китәр дип өметләнәбез. Министрлык республиканың экологик куркынычсызлыгын тәэмин итү буенча зур эшләр башкара, әйләнә-тирәлеккә йогынтыны киметү максатын күздә тоткан дәүләт программалары һәм эре инвестиция проектлары тормышка ашырыла. Мәгәр, эшебезнең төп юнәлешләреннән берсе – республикабыздагы яшь буынга экологик белем һәм тәрбия бирү булды һәм булачак. Алда күп мөһим, кызыклы эшләр тора. Мин нәтиҗәле хезмәттәшлеккә исәп тотам, сезгә яңа уңышлар һәм казанышлар телим”, – диелә Экология министры Артем Сидоровның тәбрикләвендә.
Мәктәп укучыларының Экология буенча олимпиадасы Казан (Идел буе) федераль университеты базасында 30 марттан 4 апрельгә кадәр үткәрелде. Анда Россия Федерациясенең 50 субъектында узган региональ этапларда җиңгән, 9-11 классларда укучы 250 бала катнашты. Теоретик турдан тыш, катнашучылар үзләренең тикшеренү проектларын да тәкъдим итәргә тиеш булдылар.
Министрлыкның матбугат хезмәте