Санитар икеайлык кысаларында Түбән Камада авыл җирләренә аерата игътибар ителәчәк

Түбән Кама муниципаль районында санитар-экологик икеайлык оештырып үткәрү мәсьәләсе бүген Түбән Кама индустриаль узелын үстергәндә экологик куркынычсызлыкны тәэмин итү буенча тармакара даими эш төркеменең күчмә утырышы кысаларында каралды. Утырышны Татарстан Экология һәм табигый байлыклар министры Артем Сидоров һәм Түбән Кама муниципаль районы башлыгы, Түбән Кама мэры Айдар Метшин үткәрде.
Утырышта әйтелгәнчә, инде икеайлыкны оештыру һәм координацияләү мәсьәләләре белән шөгыльләнүче оператив штаб төзелгән. Апрель башына кадәр үк шәһәр һәм районның барлык предприятие һәм оешмалары белән оештыру киңәшмәләре үткәрелгән, барлык кишәрлекләр һәм аларга беркетелгән предприятиеләр күрсәтелгән интерактив карта булдырылган. Апрель аенда гына да 8 чәршәмбе һәм шимбә өмәсе үткәрү күздә тотыла. Беренче чиратта бөтен көчләр кар һәм эре чүп-чар җыештыруга салыначак. Җыештыруга җәлеп ителгән предприятиеләр өчен икеайлык чорында калдыкларны полигоннарда бушлай кабул итү схемалары каралган.
Экологик куркынычсызлык мәсьәләләре буенча бүгенге киңәшмәдә шулай ук рөхсәтсез чүплекләр һәм аларны бетерү мәсьәләсе дә күтәрелде. Моңа аерым игътибарны үз чыгышында Татарстан экология һәм табигый байлыклар министры урынбасары, табигать саклау буенча баш дәүләт инспекторы Рәмил Низамов юнәлтте. Аның әйтүенчә, Түбән Кама районында рөхсәтсез калдык ташлау урыннарын ачыклау фактлары буенча “Калдыкларны рөхсәтсез ташлау урыннарына мониторинг” геоинформация системасына 2013 елның 9 январеннан алып 2014 елның 2 апреленә кадәрге чорда 80 нокта кертелгән, шуларның 68е “бетерелгән” статусында.
Түбән Кама башлыгы Айдар Метшин исә эш төркеме әгъзаларына Түбән Кама муниципаль районында әйләнә-тирәлекне саклау буенча озайлы максатчан программа кысаларында чүплекләрне бетерү эшләренә кирәкле, авыл җирләре өчен махсус техника сатып алуга юнәлтергә мөмкин булган акча чараларын бүлеп бирүне карарга тәкъдим итте.
Министрлыкның матбугат хезмәт