Түбән Идел бассейнының Татарстан территориясендә урнашкан сусаклагычларында су кимәлен көйләү мәсьәләләре

Бүген Татарстан Премьер-министры Илдар Халиков Түбән Идел бассейны сулыклары идарәсе җитәкчесе Анатолий Быков һәм Әстерхан өлкәсе Хөкүмәте рәисе урынбасары Олег Полумордвинов белән очрашты. Очрашуда шулай ук Татарстан экология һәм табигый байлыклар министры Артем Сидоров катнашты. Алар Түбән Идел бассейнының Татарстан территориясендә урнашкан сусаклагычларында су кимәлен көйләү буенча фикер алыштылар. Премьер-министр Илдар Халиков: су ресурсларын бәрәкәтле куллануда барлык кызыксынучы субъектларның мәнфәгатьләрен исәпкә алырга кирәк, ә бу мәсьәләдә Түбән Идел бассейны идарәсе зур роль уйный, дип белдерде.
Фикер алышулар Бассейн советының Казан Ратушасында узган XI утырышында дәвам итте. Татарстан экология министры Артем Сидоров үзенең тәбрик сүзендә ЮНИДО халыкара индустриаль хезмәттәшлек үзәгенең Россия Федерациясендә “Чикләрдән узышлы сулык бассейннарында пычрату чыганакларын табу, бәяләү һәм градацияләү, шулай ук экологик чиста технологияләр тапшыру” проекты кысаларындагы эшчәнлеген аерым билгеләп үтте. Проектның максатлары булып интеграцияле алымнар, экологик чиста технологияләр ярдәмендә Урта һәм Түбән Идел бассейнының су сыйфатын яхшырту, индустриаль активлыкның тискәре йогынтысын киметү, предприятиеләрнең экологик нәтиҗәлелеген күтәрү тора.
Совет утырышында Самар, Ульяновск, Сарытау, Әстерхан, Волгоград, Оренбург өлкәләренең, Калмык республикасының һ.б.ларның су ресурслары белгечләре дә катнашты.
Министрлыкның матбугат хезмәте