«Куркынычсызлык һәм элемтә» форумы кысаларында «Яшәү куркынычсызлыгы проблемалары: бүген һәм киләчәктә» дигән III Халыкара фәнни-гамәли конференция үткәрелде

Казанда XIX “Куркынычсызлык һәм элемтә” форумы кысаларында “Яшәү куркынычсызлыгы проблемалары: бүген һәм киләчәктә” дигән III Халыкара фәнни-практик конференция үткәрелде. Аның кысаларында, Татарстан Экология һәм табигый байлыклар министрының беренче урынбасары Рөстәм Камалов рәислегендә, министрлык тарафыннан оештырылган “Экологик куркынычсызлык” секциясе дә эшләде.
Экологик куркынычсызлык – тулаем милли куркынычсызлыкның аерылгысыз һәм мөһим бер өлеше, ул табигый тирәлекне һәм кеше тормышын хуҗалык эшчәнлеге яисә башка эшчәнлек, табигый һәм техноген сыйфаттагы гадәттән тыш хәлләр, шулар аркылы ихтимал булган тискәре йогынтыдан саклауны чагылдыра. Экологик үсеш өлкәсендәге дәүләт политикасының максатлары булып экономиканы экологик юнәлештә үстерү, биосфераның тотрыклылыгын, биологик төрлелекне һәм табигый ресурсларны саклау, гражданнарның уңайлы әйләнә-тирәлеккә хокукын тормышка ашыру, әйләнә-тирәлекне саклау һәм экологик куркынычсызлыкны тәэмин итү өлкәсендә хокук тәртибен ныгыту тора.
“Экологик куркынычсызлык” секциясе кысаларында өч мастер-класс оештырылды:
1. “Атмосфера һавасының торышына заманча контроль алымнарын күчмә лабораториядә куллану белән танышу”;
2. “Татарстан Республикасының Экологик картасы. Төзү һәм тормышка ашыру тәҗрибәсе”;
3. “Татарстан Республикасы шәһәрләрендә халык тормышының экологик куркынычсызлыгын тәэмин итү”.
Күптөрле проблемалар буенча фикер алышу һәм бәхәсләр нәтиҗәсендә экологик куркынычсызлыкны тәэмин итүнең берничә өстенлекле юнәлеше билгеләнде, шул исәптән:
– табигый экологик системаларны, ландшафтларны һәм комплексларны саклау, аларның бөтенлеген һәм функциональлеген тәэмин итү, әйләнә-тирәлеккә тискәре йогынтыны булдырмау, минимальләштерү һәм бетерү мәсьәләләренең өстенлеге;
– әйләнә-тирәлекнең җитештерү һәм куллану калдыклары белән пычрануы аркылы халык саулыгына зыян салыну ихтималын киметү;
– экологик куркынычсызлыкны хокукый тәэмин итү системасын камилләштерү, агроиндустриядә азык-төлекнең экологик куркынычсызлыгын тәэмин итә торган нормативлар һәм законнар базасы, идарә системасы булдыру,
– продукциянең барлык яшәеш стадияләрендә, экономиканың оештыру-техник кимәлен, илдә һәм дөньяда конкуренция өстенлеге факторларын исәпкә алып, ресурсларны рациональ куллану;
– каты көнкүреш калдыкларын аерым җыюны экономик стимуллауны да кертеп, калдыклар белән куркынычсыз эш итү системасын булдыру;
– әйләнә-тирәлекнең торышы турында белешмәләр җыю, экологик куркынычсызлык өлкәсендә идарә итү, барлык кимәлдәге күзәтчелек органнарының эшен үтә күренмәле итү максатларында IT технологияләр иңдерү.
Министрлыкның матбугат хезмәте