Санкт-Петербургта «Экология» V Халыкара форумы бара

Бүген Татарстан Экология һәм табигый байлыклар министры Артем Сидоров Санкт-Петербургта “БЕРДӘМ РОССИЯ” партиясенең “Санкт-Петербург – Россиянең диңгез башкаласы” проекты кысаларында узучы “Экология” V Халыкара форумы эшендә катнаша. Форум Россиянең су объектларын тотрыклы үстерү буенча нәтиҗәле чаралар әзерләүгә багышлана.
Форумның тыгыз эш программасына су ресурслары өлкәсендәге табигать саклау эшчәнлеген норматив-хокукый көйләү, коммуналь йогынты зыяннарын минимальләштерү, халыкны эчә торган су белән тәэмин итү, индустриаль юынтыларны чистарту, суднолар йөрткәндә һәм портлар эшчәнлегендә сулыкларга экологик зыян салуны киметү мәсьәләләре буенча пленар утырышлар, конференцияләр һәм түгәрәк өстәлләр кертелгән. Чарада катнашучылар Россиянең, Финляндиянең һәм Эстониянең су ресурсларында экологик куркынычсызлык булдыру өлкәсендәге хезмәттәшлек тәҗрибәсен, шулай ук хуҗалык итү, рекреация мөмкинлекләре, биологик һәм геологик төрлелекне саклау мәсьәләләрен тикшерәчәкләр.
Эш программасы белән рәттән зур күләмле күргәзмә дә оештырылган, анда әйләнә-тирәлекне саклау, техноген пычрану нәтиҗәләрен бетерү, торак-коммуналь хуҗалык, табигый байлыкларны куркынычсыз үзләштерү, экологик куркынычсыз су тәэминәте һәм су бүлү өлкәсендәге халыкара һәм региональ инновация проектлары күрсәтелә.
Форум Россия Федерациясе Табигый байлыклар һәм экологик министрлыгы, Россия Федерациясе Экономик үсеш министрлыгы, Россия Федерациясе Транспорт министрлыгы, башка профильле министрлыклар һәм тармаклар ярдәмендә һәм катнашында уза.
Татарстан Экология һәм табигый байлыклар министрлыгының матбугат хезмәте