Экология министрлыгының Ык буе территориаль идарәсендә 2013 елга йомгак ясалды

Татарстан Экология һәм табигый байлыклар министрлыгының Ык буе территориаль идарәсендә 2013 елгы эшчәнлекне йомгаклау һәм 2014 елга бурычлар билгеләү буенча киңәшмә уздырылды. Аның эшендә Министр урынбасары, республиканың Табигать саклау буенча баш дәүләт инспекторы Рәмил Низамов, Азнакай муниципаль районы башкарма комитеты җитәкчесе урынбасары Айдар Шәмсетдинов катнашты.
Дәүләти экологик күзәтчелек функцияләрен үтәү кысаларында Ык буе территориаль идарәсе 2013 елда 441 тикшерү үткәргән. 333 закон бозу ачыкланган һәм бетерелгән. Идарә инспекторлары шул фактлар буенча административ хокук бозу турында 384 беркетмә төзегән. Тулаем 785 мең сумлык административ штрафлар салынган, шуның 448 мең сумы түләтелгән. Табигать саклау законнарын тупас бозучыларга зыянны каплату буенча тулаем 769 мең сумлык дәгъвәләр белдерелгән
Халык контроле системасы аша Ык буе ТИ адресына рөхсәтсез калдык ташлау фактлары буенча 3 хәбәр кергән. Барысы да “Гариза хәл ителгән” статусында.
Киңәшмә азагында Татарстан Экология һәм табигый байлыклар министры урынбасары Рәмил Низамов “Урыссу химия заводы” ябык акционерлык җәмгыяте предприятиеләрен эшләткәндә экологик таләпләр үтәлмәүне ачыклау буенча Татарстан районара табигать саклау прокуратурасы белән бергә башкарылган эшне билгеләп үтте. Станция территориясендә 8.5 мең кубометрдан артык нефтьле калдык тупланган булган. Тискәре йогынты өчен 125 мең сумлык штраф салынган, җирләрне рекультивацияләү чаралары планы төзелгән һәм расланган.
Рәмил Низамов каты көнкүреш калдыкларын җыю, ташу, сортлау, утильләштерү системасына контрольне һәм әйләнә-тирәлеккә тискәре йогынты өчен түләтүләр җыюны көчәйтү бурычын куйды.
Ык буе территориаль идарәсенең эшчәнлеге (аерым алганда 2013 елның декабрендә Мәсәгуть авылында узган “Азнакай муниципаль районында әйләнә-тирәлекне саклау һәм экологик куркынычсызлыкны тәэмин итү” күчмә экологик семинарын әзерләп үткәрүдәге ярдәме өчен) Азнакай районы башкарма комитеты җитәкчелеге тарафыннан югары бәяләнде. Башкарма комитет җитәкчесе урынбасары Айдар Шәмсетдинов Ык буе территориаль идарәсенең башкаручы белгечләре Җәмилә Кожемякина һәм Алия Гәрәевага, аналитик контроль инспекциясе башлыгы Айгөл Ярмиевага озайлы хезмәтләре өчен Азнакай район башлыгының Мактау грамоталарын тапшырды.
Министрлыкның матбугат хезмәте