Экология министры Артем Сидоров «Бердәм Россия» партиясе яклылар форумында катнашты

Бүген “Казан” милли-мәдәни үзәгендә “Бердәм Россия” партиясенең Татарстан региональ бүлекчәсе яклылар һәм “БЕЗ БЕРГӘ!” җәмәгать оешмалары форумы булып узды. Чараны Татарстан Дәүләт советы рәисе, “Бердәм Россия” партиясенең региональ бүлекчәсе секретаре Фәрит Мөхәммәтшин ачты. Төп бурыч сыйфатында ул гражданнарны борчыган мәсьәләләрне формалаштыру һәм аларны чишү механизмнарын эшләү кирәклеген атады.
“Гражданлык җәмгыяте” секциясендә эксперт сыйфатында Татарстан Экология һәм табигый байлыклар министры Артем Сидоров та катнашты. Үз чыгышында ул, республикада экологик хәрәкәтне үстерүгә көчле этәргечне ил тарихында беренче тапкыр Әйләнә-тирәлекне саклау елы дип игълан ителгән 2013 ел бирде, ә Татарстанда, экологик иминлекне тәэмин итүдә хәлиткеч фактор булып халыкка экологик белем һәм тәрбия бирү торганны исәпкә алып, 2013 ел Экологик культура һәм әйләнә-тирәлекне саклау елы билгесе астында узды, дип белдерде. Министр арытаба республиканың еллык табигать саклау һәм профилактика чаралары (“Саф һава”, “Чиста урманнар”, “Санитар-экологик икеайлык” кебекләр), яшь буынга экологик белем бирү һәм халыкны агарту буенча киң күләмле акцияләр (“Бердәм экологик дәрес”, “Саф караш”, “Су көне” кебекләр) турында сөйләде. Республика хөкүмәте кабул иткән “Түбән Кама шәһәренең һәм Түбән Кама районының әйләнә-тирәлеген 2012-2015 елларда саклау” максатчан программасын уңышлы тормышка ашыруны, республика предприятиеләре белән актив хезмәттәшлекне әйтеп үтте. Мисал рәвешендә “Нәфис Косметик” ААҖ компаниясе белән эшләүне китерде, анда технологик процессларны яңарту нәтиҗәсендә атмосферага начар исле специфик матдәләр чыгару туктатылган. Министр шулай ук 2013 елгы социологик тикшерүләргә караганда халыкның республикадагы экологик хәлне тулаем уңай бәяләве турында белдерде.
Форум барышында Татарстан җәмәгать оешмаларының тәкъдимнәре, аерым алганда баткан судноларны паспортлау, бакчачылык ширкәтләрендә рөхсәтсез чүплекләрне ачыклауга волонтерларны җәлеп итү, халык ял итә торган яр буйларын чистарту, кече яшьтәге балаларны йөзәргә өйрәтү турындагы тәкъдимнәр дә тыңланды.
Министрлыкның матбугат хезмәте