Чаллыда Экология министрлыгының Кама буе территориаль идарәсенең эш йомгаклары буенча киңәшмә уздырылды

Чаллыда Экология һәм табигый байлыклар министры урынбасары – Татарстанның Табигать саклау буенча баш дәүләт инспекторы Рәмил Низамов катнашында киңәшмә уздырылды, анда министрлыкның Кама буе территориаль идарәсенең 2013 елгы эш йомгаклары тикшерелде һәм 2014 елга бурычлары билгеләнде.
Дәүләти экологик күзәтчелек кысаларында 2013 елда регионның 610 предприятиесендә һәм 816 объектында табигать саклау законнарының үтәлеше буенча 1828 тикшерү үткәрелгән. 1328 закон бозу очрагы ачыкланган, аларны бетерү каты контрольгә алынган. Ачыкланган бозу фактлары буенча 1191 беркетмә төзелгән.
Кама буе территориаль идарәсе буенча тулаем 6 миллион 353 мең сумлык штрафлар салынган. 5 миллион 72 мең сумлык штрафлар түләтелгән. Әйләнә-тирәлеккә һәм табигый ресурсларга салынган зыянны каплау буенча 5 миллион 85 мең сум түләтелгән. 8 предприятиенең эше туктатып торылган, 1 җинаять эше кузгатылган.
Идарәнең уңай эш нәтиҗәләрен исәпкә алып, 2014 елга бурычлар да билгеләнде. Аларга җитештерү һәм куллану калдыклары белән эшне оештыру, әйләнә-тирәлеккә тискәре йогынты өчен түләмәүче табигатьтән файдаланучыларны ачыклау, салынган экологик зыян өчен дәгъвәләр белдерү, региональ су контролен көчәйтү керә.
Киңәшмәдә шулай ук Казан районара табигать саклау прокуроры урынбасары Вадим Попов һәм Казан районара табигать саклау прокурорының өлкән ярдәмчесе Елена Шадрина катнашты. Алар территориаль идарәнең эшен тикшерү барышында ачыкланган бозулар буенча дәгъвәләрне укыдылар һәм региональ су контроленең үзенчәлекләрен аңлаттылар.
Министрлыкның матбугат хезмәте