Министрлыкның Көньяк-көнчыгыш территориаль идарәсенең 2013 елгы эш йомгаклары

Әлмәттә Көньяк-көнчыгыш территориаль идарәнең 2013 елгы эш йомгаклары һәм 2014 елга бурычлары буенча киңәшмә булып узды. Анда Татарстан Экология һәм табигый байлыклар министры урынбасары – республиканың Табигать саклау буенча баш дәүләт инспекторы Рәмил Низамов һәм Әлмәт районы башкарма комитеты җитәкчесенең беренче урынбасары Николай Богданчиков катнашты.
2013 елда Идарә инспекторлары 687 тикшерү үткәргән, 280 предприятие һәм объект тикшерелгән. Шуларда 888 бозыш, ягъни 97.9%ы ачыкланган. Нәтиҗәдә административ хокук бозулар турында 874 беркетмә төзелгән, 4 145 900 сумлык штраф салынган, 3 492 300 сумлык штраф түләтелгән (84.2%). Табигать саклау законнарын тупас бозган өчен зыянны каплау буенча судларга 2 677 351 сумлык 13 дәгъвә юнәлтелгән.
2013 елда 262 рөхсәтсез калдыклар ташлау урыны ачыкланган. 255е (97%ы) бетерелгән.
Рәмил Низамов үз чыгышында билгеләп үткәнчә, Татарстан Экология һәм табигый байлыклар министрлыгы әйләнә-тирәлекне саклау өлкәсендәге дәүләт политикасын югары кимәлдә тормышка ашыра. Министрлыкның төп бурычлары булып гражданнарның уңайлы әйләнә-тирәлеккә хокукларын, экологик куркынычсызлыкны тәэмин итү, хуҗалык эшчәнлегенең әйләнә-тирәлеккә тискәре йогынтысын булдырмау, табигать саклау программаларын һәм проектларын формалаштыру һәм тормышка ашыру тора.
Хисап киңәшмәсе азагында идарәнең алдынгы хезмәткәрләренә Мактау грамоталары һәм Рәхмәт хатлары тапшырылды.
Министрлыкның матбугат хезмәте