Роспотребнадзорның 2013 елгы эшенә йомгак ясалды

Бүген “Корстонда” Татарстан премьер-министры Илдар Халиков катнашында, Татарстан буенча Кулланучылар хокукларын һәм кеше иминлеген яклау федераль идарәсенең (Роспотребнадзорның) коллегия утырышы булып узды.
Роспотребнадзорның Экология министрлыгы белән бәйләнешләре турында доклад белән Татарстан Экология һәм табигый байлыклар министры Артем Сидоров чыгыш ясады. Аның әйтүенчә, Казан шәһәрендә атмосфера һавасын пычратуның стационар чыганаклары (предприятиеләр) һәм автотранспорт агымнары турында белешмәләр базасы, шулай ук шәһәрнең атмосфера һавасындагы пычраткыч матдәләр күләме буенча Министрлык һәм Роспотребнадзор идарәсе үткәргән үлчәүләр Универсиадага әзерлек һәм аны үткәрү барышында атмосфера һавасының тиешле сыйфатын тәэмин итүче чаралар комплексын әзерләү өчен файдаланылган.
Атмосфераны пычратуның җыелма хисаплары системасын төзү эшләре Министрлык тарафыннан, Роспотребнадзор идарәсенең, шул исәптән Чаллы һәм Түбән Каманың актив ярдәме белән үткәрелгән.
2013 елның 15 апреленнән 15 июненә кадәр барган санитар-эпидемиологик икеайлык барышында республиканың табигать саклау службалары, профильле министрлыклар һәм тармаклар, предприятиеләр һәм оешмалар, муниципаль берәмлекләрнең башкарма комитетлары зур эш башкарган. 1.5 меңнән артык рөхсәтсез чүп-чар ташлау урыны ачыкланган.
Роспотребнадзор идарәсе һәм Татарстан буенча Роспотребнадзор, Казан шәһәре административ-техник инспекциясе белән берлектә шәһәрнең Урта Кабан күленә чыга торган яңгыр суы коллекторлары тикшерелгән, бу исә су сыйфатын яхшыртуга китергән. Урта Кабан күленә тискәре йогынты ясый торган 51 предприятие тикшерелгән
Урта Кабан күлендәге суның сыйфатына Министрлыкның Үзәк махсус аналитик контроль инспекциясе белгечләренең Роспотребнадзор белән берлектә контроль үткәрүе дәвам итә. Бүтән су объектлары, мәсәлән Казансу елгасы акваториясе дә күзәтелә, анда 2015 елгы Су спорты бөтендөнья чемпионатына әзерлек эшләре алып барыла.
Республиканың торак пункт чикләрендә булган барлык автоягулык станцияләренә бензин парларын тоту системасы кую проекты кысаларында Роспотребнадзор идарәсе хәзерге вакытта исәп чикләрен нигезләү проектлары буенча 27 санита𬬬-эпидемиологик нәтиҗә һәм автоягулык станцияләренең тиешлечә җиһазлау өчен кирәкле санитар-саклау зоналары чикләрен билгеләү буенча 3 нәтиҗә биргән.
Уртак эшчәнлекнең мөһим юнәлешләре арасында шулай ук Түбән Кама индустриаль узелы өчен атмосфера һавасы пычрану буенча җыелма исәпләр ясау да бар, ул бу индустриаль комплекс өчен бердәм санитар-саклау зонасын проектларга мөмкинлек бирә.
Татарстанның Экологик культура һәм әйләнә-тирәлекне саклау елы кысаларында ирешелгән хезмәттәшлек кимәле арытаба да сакланырга һәм үстерелергә тиеш, дип нәтиҗә ясады Артем Сидоров.
Министрлыкның матбугат хезмәте