Россия Федерациясе Табигый байлыклар һәм экология министрлыгы «Табигатебез» дәүләти мәгълүмәт системасын кулланышка кертте

Җәмәгать контроле, көнүзәк проблемаларга күзәтчелек, халык фикерен өйрәнү һәм кайтма бәйләнеш булдыру максатыннан, Россия Федерациясе Табигый байлыклар һәм экология министрлыгы әйләнә-тирәлекне саклау буенча “Табигатебез” дәүләти җәмәгать контроле һәм белешмә системасын төзеде. Татарстан Республикасында шундый ук “Халык контроле” һәм “Дәүләти экологик күзәтчелек” системалары 2012 елның апреленнән бирле эшли. 2012 елның ноябрендә бу системалар Мәскәүдә Россия Федерациясе Табигый байлыклар һәм экология министры Сергей Донскойга Татарстан Республикасы Экология һәм табигый байлыклар министры Артем Сидоров тарафыннан тапшырылган иде. (Киңәшмәдә шулай ук Россия Федерациясе Элемтә һәм массакүләм коммуникацияләр министры Николай Никифоров катнашты.) Татарстан системасы кебек үк, “Табигатебез” мобиль кушымтасы һәм сайты гражданнарга экологик хокук бозулар турында, тиешле урынның картадагы анык координатларына бәйле рәвештә, үз вакытында хәбәр итү мөмкинлеге бирә. 2014 елда “Табигатебез” системасы күбесенчә территорияләрне каты көнкүреш калдыклары белән пычратуларны бетерү өчен кулланылачак.
Министрлыкның матбугат хезмәте